Kenya igiye kwakira Inteko Rusange ya 21 ihuza Abepiskopi Gatolika bo muri Afurika y’Iburasirazuba

Mu kiganiro bagiranye n’itangazamakuru ku wa 23 Kamena 2026, aba Bepiskopi basabye abakristu Gatolika, Abanyakenya bose ndetse n’abafatanyabikorwa b’umutima mwiza kuzitabira no gushyigikira iyi nama iteganyijwe kuva ku wa 19 kugeza ku wa 26 Nyakanga 2026, izabera muri Kaminuza Gatolika ya Afurika y’Iburasirazuba (CUEA) i Nairobi.

Bagize bati “Iki ni igikorwa gikomeye kandi ni ishema rikomeye kuri Kiliziya Gatolika muri Kenya ndetse no ku gihugu cyacu.”

Iyi Nteko Rusange ya AMECEA izaba iyobowe n’insanganyamatsiko igira iti “Urugendo rwa Sinodi rwa AMECEA ifatanyije n’Urubyiruko: Kubaka Ikiraro cy’Ubumwe, Icyizere, Ubutabera n’Imiyoborere Myiza.”

Abepiskopi bavuze ko iyi nama ari umwanya w’ingenzi ku Kiliziya kugira ngo yige ku bibazo bikomeje kugaragara mu karere, cyane cyane ibijyanye no guherekeza no gufasha abaturage bo mu bihugu bigize AMECEA.

Bagize bati “Kwakira Inteko Rusange ya AMECEA ntabwo ari intambwe ikomeye mu buzima bwa roho bwa Kiliziya gusa, ahubwo binazamura isura n’icyubahiro cya Kenya ku rwego mpuzamahanga, bikerekana igihugu cyacu nk’icy’amahoro, cyakira neza abashyitsi kandi giteza imbere ubufatanye bw’akarere.”

Mu kiganiro cyabereye muri Donum Dei, Roussel House i Karen, Abepiskopi bagaragaje ko bizeye ubufatanye n’inzego za Leta kugira ngo iyi nama izagende neza.

Umunyamabanga Mukuru wa AMECEA, Padiri Antony Makunde, yatangaje ko hategerejwe Abepiskopi bagera ku 140 bazaturuka mu bihugu bitandukanye byo muri Afurika y’Iburasirazuba.

Mu kiganiro cyashyizwe ahagaragara na Radio Maria Tanzania ku wa 16 Kamena 2026, yavuze ko uwo mubare ugaragaza uko iri huriro ry’Abepiskopi ryakomeje kwaguka kuva ryashingwa muri Nyakanga 1961 muri Tanzania.Yagize ati “Turateganya kwakira Abepiskopi bagera ku 140 muri iyi nama duteganya mu kwezi gutaha.”

AMECEA ihuza Inama z’Abepiskopi Gatolika zo mu bihugu bya Eritereya, Ethiopia, Kenya, Malawi, Sudani y’Epfo, Sudani, Tanzania, Uganda na Zambia, mu gihe Djibouti na Somalia bifite ubunyamuryango bwihariye bwo kwifatanya n’iri huriro.

Mu gihe imyiteguro ikomeje, Umuyobozi wa Kaminuza Gatolika ya Afurika y’Iburasirazuba (CUEA), Padiri Prof. Stephen Mbugua Ngari, yatangaje ko iyi kaminuza yiteguye neza kwakira iyo nama.

Mu itangazo ryabo ryo ku wa 23 Kamena, Abepiskopi ba Kenya basabye abakristu bose ndetse n’abaturage bo mu karere ka Afurika y’Iburasirazuba gusabira iyi nama no kuyigiramo uruhare.

Banahamagariye paruwasi, imiryango remezo ya gikristu n’ibigo bya Kiliziya gutanga umusanzu uwo ari wo wose ushoboka, haba mu buryo bwa roho, ubufasha bw’imyitwarire myiza cyangwa ibikoresho, mu rwego rwo kwakira neza abazitabira iyi Nteko Rusange ya AMECEA.