Kiliziya nshya yo Kwa Yezu Nyirimpuhwe yahawe umugisha

Ibirori byo gutaha iyi Paruwasi byabimburiwe n’igitambo cya Misa cyatuwe na Myr Balthazar Ntivuguruzwa ari kumwe na Myr Smaragde Mbonyintege, Umwepiskopi wa Kabgayi uri mu kiruhuko cy’izabukuru ari nawe watangije umushinga wo kuyivugurura.

Uretse abihayimana n’ Abiyeguriye Imana mu byiciro binyuranye, ibi birori byanitabiriwe n’abayobozi mu nzego za Leta barimo Senateri Evode Uwizeyimana, Abadepite barimo Mediatrice Izabiriza, Uwanyirigira Gloriose, Umuyobozi w’Akarere ka Ruhango, Bwana Valens Habarurema n’abandi.

Kiliziya yatashywe, yubatswe ku bufatanye bwa Diyosezi, Abakristu, Abapadiri bahakorera ubutumwa n’ inzego za Leta.

Mu butumwa bwe Myr Balthazar yasabye abakristu ba Paruwasi ya Ruhango gukomeza kwimakaza umuco w’ubufatanye no gushyira hamwe kugira ngo bazagere no ku bindi byinshi byiza nk’uko biyujurije Kiliziya nziza.

Myr Balthazar akomeza avuga ko ubwo bumwe n’ubufatanye butagomba kugarukira mu kubaka inyubako gusa ahubwo ko gufatana urunana bikwiye no gukomeza kuranga abakristu no mu rugendo rw’ukwemera, ukwizera n’urukundo.

Padiri Dominic Tumaini Ngendahayo uyobora Paruwasi ya Ruhango avuga ko ari ibyishimo ku bakristu b’iyi Paruwasi bari bamaze imyaka 24 bifuza Kiliziya nziza ariko bakaba bayujuje mu myaka ibiri gusa.

Akomeza ashimira uruhare rw’abakristu bagize ishyaka rikomeye n’ubwitange mu kubaka Kiliziya nini kandi ijyanye n’igihe.

Nyuma y’imbogamizi zagiye zikoma mu nkokora ubushobozi bw’abakristu ba Paruwasi ya Ruhango, Pascal Nzayino, Umuyobozi w’inama nkuru ya Paruwasi ashimira abakristu batacitse intege ahubwo bagakomeza gushyiramo imbaraga kugira ngo Kiliziya yuzure.

Yagize ati “Turishimye cyane kuko tubonye kiliziya yacu. Turashimira Imana ko yuzuye ntawe uyikomerekeyemo. Gufatanya nicyo cyaturanze muri iki gikorwa, byose mu miryango remezo twagiye dusigasirana none twatashye kiriziya. Twahuye n’inzitizi kubera icyorezo cya covid 19 cyadukomye mu nkokora kuko hari ibyo twasanze ibiciro byariyongereye ku isoko kubera icyorezo bituma ingengo y’imari twari twarateguye irenga, twahuye n’igihe cy’izuba ryinshi mu mwaka wa 2023, kuko abakristu bacu benshi ni abahinzi bamwe ntibejeje imyaka kubera izuba ryinshi ryavuye, (…) ariko ibyo byose ntibyatubujije gukomeza kubaka Kiliziya yacu.”

Kiliziya nshya ya Paruwasi ya Ruhango yuzuye itwaye akabakaba Miliyoni 200 z’amafaranga y’u Rwanda. Uretse isakaro ryatanzwe na Diyosezi ya Kabgayi, ibindi byose byavuye mu mbaraga z’abakristu b’iyi Paruwasi n’inshuti zayo. Kuri ubu ifite ubushobozi bwo kwakira abantu ibihumbi 2000 bicaye neza, ikaba yararagijwe Yezu nyirimpuhwe.

Nzayino yaboneyeho gushimira abakristu bose batanze inkunga cyane cyane abajya mu Ruhango ku munsi w’isengesho ndetse n’inshuti za paruwasi zose.

Kugeza ubu iyi Paruwasi iyoborwa n’abapadiri bo mu Muryango w’Abogezabutumwa b’Abapalotini.