Korali Saint Pierre Gitarama yatangije gahunda y'ibitaramo muri Kabgayi.

Atangiza iki gitaramo padiri Joseph-Emmanuel Kageruka, umunyamabanga wa Diyosezi ya Kabgayi, akaba n'intumwa y'umwepisikopi, yavuze ko iyogezabutumwa mu ndirimbo rishyigikiwe kandi riteza imbere ubukristu binyuze mu buhanzi, asaba izindi korali kubigira intego hakajya haboneka ibitaramo bitandukanye muri Kabgayi.

Iki gitaramo cyabereye mu busitani bwa Hotel Saint-André Kabgayi kitabiriwe n'abasaseredoti, abihayimana n'abaririmbyi bo mu makorali atandukanye.

Bamwe mu bitabiriye iki gitaramo bavuze ko bishimiye kubona umuziki mwiza wa korali saint Pierre, bavuga ko biteze kubona n'andi makorali asusurutsa Kabgayi.

Nyiransabimana Valentine, umuyobozi wa Korali Saint Pierre, mu kiganiro yagiranye na Kinyamateka yavuze ko iyi Korali yishimiye uko iki gitaramo cyagenze.

Yagize ati "Hano muri Kabgayi ntabwo ibitaramo by'amakorali nk'ibi twari tubimenyereye. Turashimira Imana cyane kubera iki gitaramo idushoboje gukora kuko kuva kera twarabyifuzaga tugakomeza gutinya. Twagize n'umugisha umuririmbyi akaba n'umuhanzi Rwabigwi Cyprien aza gufatanya natwe. Biduteye ishema.

Perezida wa Korali Saint Pierre akomeza avugako bateye intambwe ya mbere bakaba batinyutse, bityo ko bagiye gukomeza bakajya bategura ibitaramo ku buryo buhoraho bagatumira n'andi makorali yo muri Kabgayi n'ahandi kandi bagakomeza no kuzamura urwego rw'umuziki ukarushaho kugera ku rwego rushimishije.

Rwemera Leon umwe mu baririmbyi ba Korali Saint Pierre yavuze ko iyi korali ya Saint Pierre iri mu za mbere muri Paruwase ya Gitarama ariko akaba ari inshuro ya mbere bateguye igitaramo gikomeye nk'iki.

Yagize ati "Iyi korali yatangiye mu 1986 yitwa Lautado Domini, yari igizwe cyane n'abasaza baririmbaga ikiratini. Uko umuziki wagiye utera imbere ntabwo twakomeje muri iyi njyana y'ikiratini gusa, ahubwo twabonye urubyiruko rurimo n'abana twabyaye batangira kwiga umuziki ugezweho.Twishimiye iki gitaramo dusoje, twariteguye, dushyiramo imbaraga zishoboka none uyu munsi Imana yabitweretse."

Uwitije Fiacre wo muri paruwase ya Gitarama akaba na visi Perezida wa korali Angelus Dei na yo iri gutegura igitaramo muri uku kwezi kwa munani.

Yagize ati "Twishimiye kuba tubonye ibintu byiza nk'ibi muri Diyosezi yacu byongeye muri Gitarama. Twifuza ko byazajya bihoraho, umuziki wa Rwabigwi ntube muri Kigali gusa ahubwo no mu zindi Diyosezi akabageraho bagasusuruka. Twishimiye ko Umwepisikopi wacu adushyigikiye mu iyogezabutumwa ry'amakorali, ndetse natwe turi kubategurira igitamo muri uku kwezi kwa munnani cyiswe Ave Maria.”

Uwababyeyi Consolé yavuze ko iki gitaramo cyateguwe na korali saint Pierre ifatanyije na Rwabigwi kibateye inyota yo kurushaho kumva ko bagomba kujya muri korali na bo kugira ngo bakomeze kuryoherwa no gusingiza Imana mu ndirimbo. Bifuza ko iki gitaramo cyaba ngarukamwaka, Kabgayi igakomeza kugira izindi korali zizajya zikora ibitaramo kuko bifasha abakristu kuryoherwa n'ibyiza byo muri Kiliziya.

Korali saint Pierre ni korali yo muri Paruwase ya Saint André Gitarama imaze imyaka 39 ivutse. Ifite abaririmbyi 116, ikaba iririmba mu ndimi zigera kuri 6 zirimo: Ikinyarwanda, Igifaransa , Icyongereza, Ikigande , n'Ikilatini."