Myr Balthazar yasuye Paruwase ya Cyeza bafitanye amateka .

Myr Balthazar yabwiye abakristu ba Paruwase ya Cyeza ko yaje kubasura kugira ngo bamumenye nawe abamenye, ni muri gahunda yiswe umunsi uhuza umwepisikopi n’abo yaragijwe.

Mu nyigisho ye, myr Balthazar yasabye abakristu ba Paruwase ya Cyeza gukomera mu kwemera kuko ari nayo ntego nyamukuru y’uruzinduko rwe muri iyi paruwase. Ati” Bakristu ba Cyeza cyeza Imana,nishimiye kubana namwe uyu munsi , nishimiye kubasuhuza mu izina rya Yezu, naje kubakomeza, ni mukomere mukwemera no kubatura Yezu kugira ngo ababere byose mumukurikire. Ukurikiye Yezu ntatana, ntagenda mu mwijima, uwemera Yezu arizera kuko ari we mizero yacu, niwe mahoro yacu, akaba n’umukiza wacu. Murakagira Yezu, ndabifuriza kubana na Yezu, musabanena Yezu kandi muturane na Yezu mugendane nawe igihe cyose. “

Myr Balthazar yibukije abanya Cyeza ko bafitanye amateka akomeye kuko bagize uruhare runini mu busaseredoti bwe ,kubera uko bamwakiriye ubwo yaharuhukiraga ari umufaratiri. Yagize ati” Banya Cyeza dufitanye amateka, kuva mu 1993 ubwo nazaga hano I Cyeza mu biruhuko hari padiri Gigi witabye Imana muri jenoside yakorewe abatutsi 1994. Mu gihe cy’ukwezi n’igice, uko mwamfashije mwebwe abakristu hamwe na padiri Gigi ni byo bituma dufitanye amateka akomeye. Igihango gikomeye kikaba ari ukuba narashyikirijwe inkoni y’ubushumba n’umwana wanyu Myr Mbonyintege Simaragde wananyicaje ku ntebe yicayeho y’ubwepisikopi. Yabifurije kuba abakristu bahora bakeye (smart) nk’uko n’ubundi ari abakristu basobanutse.

Yabasabye gukomera k’ukwemera no gukomeza kwiyubakira paruwase yabo mumpano zinyuranye zitatse paruwase ya Cyeza , gukomeza kubaka umuryango Kristu yironkeye binyuze mu makorali, imiryango remezo, utugoroba tw’abana, amatsinda anyuranye y’abakristu mu miryango y’agisiyo gatolika, mu butumwa bw’abahereza bato n’abahereza b’ingoboka b’ukaristiya, abita ku barwayi, abashinzwe Caritas no muri ba 72.

Yababwiye ko batari bonyine Yezu na Roho mutagatifu bahari kugira ngo babatere imbaraga babashishikarize maze bashire ubwoba. Yabasabye gufungura imitima kugira Yezu abaturemo kandi abakize. Myr yasoje yifuriza umugisha w’Imana abakristu ba paruwase ya Cyeza, abasaseredoti n’abihayimana muri rusange. Agira ati” Paruwase ya Cyeza ihore ibereye Imana, ihore icyeza Imana Nyir’ubugingo kandi Nyir’ineza.”

Padiri Mukuru wa Paruwase ya Cyeza Aloys MUNYANSANGA yavuze ko igihe cyari iki ngo abakristu ba Cyeza bibonere umushumba baragijwe dore ko inkuru yabatashyeho ko bahawe umushumba mushya. Ati ‘’ Ibi birori birashamaje, abanyacyeza baranezerewe, baranyuzwe, kandi batewe ishema no gutaramana n’umubyeyi.”

Nshimiyimana Fulgence umuyobozi w’inama nkuru ya Paruwase yavuze ko Cyeza ifitanye amateka akomeye cyane na Myr mushya Balthazar Ntivuguruzwa kuko kuba myr Simaragde Mbonyintege yasimbuye ari nawe wamuhaye inkoni y’ubushumba bwo kuyobora Diyosezi ya Kabgayi bituma biyumva nk’abana bakunzwe, paruwase ikunzwe kandi ikomeye. Yakomej avuga ko inka bahaye umwepisikopi ari igihango bagiranye. Ati “Ni inka y’urukundo kandi ikaba n’ikimenyetso kerekana ko dufitanye ubumwe n’umwepisikopi bikaba bashaka kugaragaza ko abanya Cyeza tutazaba na rimwe intati ya kiliziya.”

Aimable Musabwa umunyamabanganshingwabikorwa w’umurenge wa Cyeza yavuze ko ari umunsi udasanzwe kwakira umwepisikopi I Cyeza. Yavuze ko bishimiye kwakira umugisha w’umwepisikopi, asaba abakristu ko batawupfusha ubusa ahubwo ko ubaherekeza igihe cyose.

Havugimana Theophile umwe mu bakristu ba Paruwase ya Cyeza avugako bishimiye gusurwa n’umwepisikopi by’umwihariko bikaba bibasigiye ibyishimo n’ imbaraga zo kurusaho gukomera mu kwemera. Bishimira uko ubuyobozi bwa kiliziya bubegera kandi bukabahora hafi mu isengesho rya buri munsi bagafatana urunana baharanira ko kiliziya y’Imana yatera imbere. Bavuga ko bafite byinshi baratira abandi harimo no gusukura kiliziya yabo na santarale zose ari nacyo cyatumye zose zikomeza gufungurwa. Kuri ubu bari mu bikorwa by’ubukangurambaga bwo gushishikariza abakristu kwitabira imiryango y’agisiyo gatolika kuko hari iyari isigayemo abantu bakuze gusa, bakaba bashishikariza urubyiruko n’abandi bantu kuza muri iyi miryango y’agisiyo gatolika kuko ari zo mbaraga za kiliziya.

Paruwase ya Cyeza yaragijwe uruhanga rutagatifu rwa Yezu, ari nayo Myr Simaragde Mbonyintege uri mu kiruhuko cy’izabukuru avukamo, akanayibere umusaseredoti wayo wa mbere yashinzwe tariki ya 11/10/1962, ifite santarale 4 Cyeza , Rutobwe, Sholi na Biringaga, zose ziturirwamo igitambo cya misa buri cyumweru akarusho kakaba ari uko zose zifunguye muri iki gihe andi maparuwase amwe namwe afunze ndetse na santarale zitari nkeya. Ifite abakristu basaga ibihumbi 34, uturere tw’ubutumwa 15, n’imiryangoremezo 153, Kiliziya ya Paruwase yubatswe mu 1967.