Myr Papiyasi MUSENGAMANA yifatanyije n’Abakristu ba Paruwasi ya Nyagahanga kwizihiza Yubile y’Imyaka 75 iyi paruwasi imaze ishinzwe

Mu birori byo kwizihiza iyi Yubile, abakristu ba Paruwasi ya Nyagahanga bagaragarije ibyishimo batewe n’uko iyi paruwasi iri muzambere zashinzwe muri iyi diyosezi, ibafasha gutera intambwe mu ba mbere bamenye Imana, ndetse no mu bikorwa by’’iterambere bazaniwe na paruwasi.

Mu ijambo yagejeje ku bakristu ba Paruwasi Nyagahanga, Myr Papiyasi Musengamana yashimiye abakirisitu b’iyi paruwasi ku rugero rwiza rw’ubukirisitu batanga, anabasaba gukomeza kurerera Imana abazayikorera mu gihe kizaza.

Muri ibi birori, hatanzwe Isakaramentu ry’Ubusaseridoti kuri Padiri Innocent Ndayambaje uvuka muri paruwasi ya Kora muri Diyosezi ya Nyundo warasabye kuba umupadiri wa diyosezi ya Byumba akabyemererwa na Myr Seriviliyani Nzakamwita umwepiskopi w’iyi diyosezi uri mu kiruhuko cy’i zabukuru.

Nk’uko amateka y’iyi paruwasi abigaragaza, Paruwasi ya Nyagahanga yashinzwe n’Abapadiri Bera(Peres Blancs )bazwi ku izina ry’Abamisiyoneri ba Afurika tariki 1 Kanama 1947, itangirana n’abakristu 20 gusa, Uko iminsi yagiye yiyongera ni nako abatuye mu gace iherereyemo bagiye bayoboka ubukristu, bahabwa amasakaramentu. Uyu munsi ifite abakristu bagera 47.896 bangana na 54,5% by’abaturage batuye ku buso ibarizwaho.

Imbuto abapadiri bera babibye muri iyi paruwasi ntabwo zaheze mu gitaka cyangwa ngo zigwe mu mahwa. Ibi bigaragazwa kandi n’umubare abasore n’inkumi bayivukamo bahisemo kwitangira Kiliziya, bafata iya mbere maze biyegurira Imana mu miryango itandukanye. Kuva yashingwa, Paruwasi Nyagahanga imaze kwibaruka abihayimana 23, barimo abapadiri 7 n’Umwepiskopi 1 ariwe Myr Misago Augustinwari Umwepiskpi wa mbere wa Diyosezi ya Gikongoro witabye Imana mu 2012, abafureri 4 n’ababikira 11.