Myr Visenti Harolimana arasaba imiryango y'Agisiyo Gatolika kwagura amarembo ikakira Bose

Ni ubutumwa yabagejejeho mu birori byo gusoza Kongere y’iminsi ibiri ku nshuro ya gatanu. Yitabiriwe n’abagera kuri magana ane bibumbiye mu Ihuriro Inshuti za Yezu baturutse mu ma Paruwasi anyuranye ya Diyosezi ya Ruhengeri.

Ibi birori byabimburiwe n’Igitambo cya Misa cyaturiwe muri Paruwasi Katedrali ya Ruhengeri. Mu nyigisho yagejeje ku bakristu, Umwepiskopi wa Diyosezi ya Ruhengeri yabifurije Umunsi mukuru mwiza wa Kristu Umwami. Abibutsa ko Ingoma ya Kristu itandukanye n’iy’abatware. Abamenyesha ko Kristu ari Umwami w’Ijuru n’isi, akaba Intangiriro n’iherezo ry’ibiriho byose. Yagize ati: “Kristu niwe weguriwe ingoma, icyubahiro n’ubwami mu miryango yose, mu mahanga yose kandi abamuyobotse baberwa n’uko bafite umwami w’amahoro. Ubwami bwe ni ubwami buhoraho iteka ntibuzashira. Ingoma ye ni ingoma itazagira ikiyihungabanya”.

Musenyeri Visenti yabasobanuriye ibikwiye kuranga abayobotse Kristu Umwami birimo, kuba inkunzi z’amahoro, kurangwa n’ukuri, ibyishimo, umunezero, ubuvandimwe, ubutabera, urukundo n’amahoro. Ahamya ko abayobotse uwo Mwami w’amahoro bahirwa.

Yagize ati: “Twebwe aba Kristu twamumenye tukamuyoboka turahirwa”. Yabararikiye kumva ko bafite Umwami uganje, bakemera kugengwa n’amatwara ya Kristu Umwami wabo, bakabera Kristu inshuti, bakaberwa no gukurikira Kristu.

Umwepiskopi yasabye abari mu Ihuriro Inshuti za Yezu n’indi miryango y’Agisiyo Gatolika muri rusange gukuraho imipaka, bagafungura amarembo bakajya bakira ibyiciro byose byifuza kwinjira mu Ihuriro Inshuti za Yezu.

KABERA Gervais umuyobozi w’Ihuriro Inshuti za Yezu ku rwego rwa Diyosezi ya Ruhengeri avuga ko iri huriro ryabongereye imbaraga bakaba bariyrmeje kuba umusemburo mwiza aho bari hose.

Ihuriro Inshuti za Yezu muri Diyosezi ya Ruhengeri rimaze imyaka 19 rishinzwe. Rikaba kugera ubu ribarizwamo abagera ku bihumbi bibiri (2000).