Padiri Jean Marie Vianney TWAGIRAYEZU yatorewe kuba Umwepiskopi wa Kibungo: Incamake y’ubuzima bwe
Kuri uyu wa mbere Tariki 20 Gashyantare 2023, Nyirubutungane Papa Fransisiko yatoreye Padiri Jean Marie Vianney TWAGIRAYEZU kuba Umwepiskopi wa Diyosezi ya Kibungo. Ni inkuru yamenyekanye ku i saa sita z’amanwa i Roma mu Butaliyani n’i Kigali mu Rwanda. Musenyeri Jean Marie Vianney TWAGIRAYEZU ubusanzwe yari Umunyamabanga Mukuru wa Caritas Rwanda kuva mu 2016.
Incamake y’Ubuzima bwe
Padiri Jean Marie Vianney TWAGIRAYEZU yavutse ku wa 21 Nyakanga 1960 ku Gisenyi muri Diyosezi ya Nyundo ari naho yize amashuri abanza n’ayisumbuye. Yize amasomo ya Seminari Nkuru icyiciro cya Filozofiya hagati y’1988 -1990 muri Seminari Nkuru ya Nyakibanda,ahakomereza n’amasomo y’icyiciro cya Tewolojiya hagati y’1990-1994. Yahawe Ubusaseridoti nk’Umupadiri wa Diyosezi ya Nyundo ku wa 8 Ukwakira 1995.
Padiri Jean Marie Vianney TWAGIRAYEZU yakoreye ubutumwa mu maparuwasi atandukanye ya diyosezi ya Nyundo;kuva 1995-1997 yabaye padiri wungirije muri paruwasi Muramba na Kibingo. Kuva 1997-2000 yagiye gukomeza amasomo ya Tewolojiya muri Kaminuza Gatolika y’i Louvain mu Bubiligi, ahakura impamyabumenyi.
Agarutse mu Rwanda, kuva mu 2000-2002 yabaye umuyobozi wa Caritas ya Diyosezi ya Nyundo; kuva mu 2002-2009 Ahabwa ubutumwa bw’Ushinzwe umutungo wa Diyosezi ya Nyundo.Kuva mu 2009-2016 yasubiye gukomeza amasomo mu Bubiligi, ahakura impamyabumenyi mu gucunga imishinga ari nako akora ubushakashatsi ku rwego rw’Ikirenga(Doctorat/PHD Candidate)muri Tewolojiya, muri Kaminuza ya Louvain.
Asoje amasomo mu 2016 yagarutse mu Rwanda ari nabwo yatorewe kuba Umunyamabangu mukuru wa Caritas Rwanda, inshingano yari agikora kugeza none ku wa 20 Gashyantare 2023 ubwo Nyirubutungane Papa Fransisiko yamutoreye kuba Umwepiskopi wa Kibungo.
Kinyamateka imwifurije Ubutumwa bwiza
Ibitekerezo (0)
- Nta gitekerezo kirahaba. Ba uwa mbere utanga igitekerezo.
