Padiri Kayisabe Vedaste yashimiwe umusanzu we mu burezi bwa Seminari Nkuru ya Kabgayi amazemo imyaka 16

Iyi Yubile yahujwe n’ibirori byo gufungura ku mugaragaro umwaka w’amashuri 2023/2024 muri iri shuri, yabanjirijwe n’Igitambo cya Missa cyatuwe na Musenyeri Balthazar Ntivuguruzwa, Umwepiskopi wa Diyosezi ya Kabgayi.

Ni ibirori byitabiriwe kandi n’Umwepiskopi wa Diyosezi ya Butare, Myr Philippe Rukamba, Umwepiskopi wa Diyosezi ya Byumba, Myr Papias Musengamana, Musenyeri Smaragde Mbonyintege uri mu kiruhuko cy’izabukuru, Père Hugues Paulze d'Ivoy uhagarariye umuryango w’abashanuwane ‘Chanoine réguliers de Saint-Victor’ n’abandi bihayimana batandukanye.

Mu ijambo rye, Musenyeri Ntivuguruzwa yifurije Padiri Vedaste Kayisabe Yubile nziza y’imyaka 25 Nyagasani amusize amavuta y’ubutore.Yaboneyeho kumushimira ibyo yakoze mu mirimo yakoze mu gihe cy’imyaka 16 amaze mu iseminari nkuru ya Kabgayi, irimo ine yamaze ari Umuyobozi w’amasomo ndetse na 12 yamaze ari Umuyobozi w’iri shuri. Yanamubwiye kandi ko Inama nkuru y’Abepiskopi Gatolika mu Rwanda imushimira kubw’uwo murimo. Amusaba kuzakomeza kwerekana ubusaseridoti no gukomeza kuyihimbazanya ukwicisha bugufi.

Musenyeri Philippe Rukamba nk’umuntu wayoboye Padiri Kayisabe mu gihe yigaga mu iseminari, yavuze ko ikimuri k’umutima ari ugushimira ubuntu bw’Imana bwafashije Padiri Kayisabe kuba agejeje imyaka 25 ari umusaserdoti.

Yakomeje amusaba kugira umutima muzima ndetse anamubwira ko Kiliziya imwizeye.

Yagize ati: “Muri Kiliziya tugira urukundo, ukwizera, bityo rero turakwizeye kandi twizeye ko uzakomeza kuduha abapadiri beza.”

Aganira na Kinyamateka, Padiri Kayisabe yavuze ko ashimira Imana yamushoboje, kuko umurimo w’ubusaseridoti usaba byinshi ndetse akaba ntawahamya ko ari we wabyigejejeho. Avuga ko icyamushoboje mu rugendo rwo kwiha Imana ari ikiganza cy’Imana.

Agira inama abaseminari bakiri mu nzira yo kwiha Imana, yavuze ko kwiha Imana ari umurimo usaba ubwitange n’imbaraga, guca bugufi no kumva neza ibyo umuntu arimo.

Ku itariki ya 30 Nyakanga 2023 nibwo Padiri Kayisabe Vedaste yahimbaje Yubile y’imyaka 25. Ibirori yayihimbarijemo byabereye muri Paruwasi ya Mukarange iherereye muri Diyosezi ya Kibungo mu karere ka Kayonza ari naho avuka.

Ati: “Nk'uko intego yanjye ibivuga igira iti “Koko Dawe ni ko wabyishakiye”. Niyeguriye ugushaka kw’Imana ngo abe ari ko gukorwa.”

Yakomeje avuga ko icyo arangamiye ari ugushaka kw’Imana mu myaka iri imbere no gukomeza kuguma mu budahemuka bw’isezerano yagiranye n’Imana.

Yagize ati: “Hari abaza mu muhamagaro bakaza batumva ibyo ari byo, bakaza nk’abagiye muri kaminuza zindi zisanzwe, badashaka kugira imyitwarire ijyanye na seminari nkuru. Ibyo bituma umuntu rimwe na rimwe acika intege iyo abibonye ku buryo kubasezerera umuntu anabikora atabishakaga. Gusa umuntu abishyira mu isengesho rye bikamuha imbaraga zo gukomeza.”