Papa Fransisiko agiye kugirira Uruzinduko mu gihugu cya Kazakisitani

Nkuko byatangajwe na Matteo Bruni umuyobozi wa "Holy See press office" ishinzwe ibijyanye na gahunda za Papa, biteganyijwe ko ku matariki ya 13-15 Nzeri 2022, Nyirubutungane Papa Francisco azagirira uruzinduko mu Gihugu cya Kazakhstan; rukazaba ari uruzinduko rwa 38 rwa gishumba Papa Fransisiko kuva yatorerwa kuba Umushumba wa Kiliziya Gatolika ku isi.

Muri uru ruzinduko, Papa Fransisiko azanitabira Ihuriro mpuzamahanga rya karindwi ry’abahagarariye amadini ku isi(the VII Congress of Leaders of World and Traditional Religions), ihuriro rizabera mu mujyi wa Nur-Sultan, umurwa mukuru w’iki gihugu.

Uru ruzinduko ruje nyuma y'ubutumire bw'abayobozi ba Kiliziya Gatolika muri Kazakisitani bari barasabye Nyirubutungane kuzagenderera iki Gihugu. Muri Mata uyu mwaka, Perezida wa Kazakisitani Bwana Kassym-Jomart Tokayev na we yatangaje ko Papa Fransisiko afite gahunda yo gusura iki gihugu n’ubwo atavuze igihe bizabera.

Mu kiganiro yagiranye n'itangazamakuru kuwa Gatandatu tariki 29 Nyakanga 2022 ubwo yavaga mu ruzinduko yari yagiriye mu gihugu cya Kanada, Papa Francis yatangaje ko yifuza kugenderera kimwe mu bihugu by'Uburasirazuba bwo hagati.

Igitekerezo cyo gushyiraho ihuriro mpuzamahanga ry’abahagarariye amadini cyatangijwe n’uwahoze ari perezida w’igihugu cya Kazakisitani bwana Nursultan Nazarbaev abisabwe na Muragatifu Papa Yohani Pawulo wa Kabiri, ku munsi mpuzamahanga wo gusaba isi amahoro, umunsi wizihirijwe ahitwa Assisi mu Butaliyani mu 1986, wari wahuje abahagarariye amadini anyuranye yo ku isi bose bahuje intero yo gusabira ubwumvikane, amahoro n’imibanire myiza hagati y’abasengera mu madini anyuranye yo ku isi. Iri huriro riterana bwa mbere mu 2003. Rikaba riterana rimwe buri myaka itatu.

Insanganyamatsiko y’iri uyu mwaka ikaba igira iti “The Role of Leaders of World and Traditional Faiths in the Socio-Spiritual Development of Humanity after the Pandemic".

Papa Fransisiko ni uwa kabiri mu bashumba ba Kiliziya Gatolika ku isi basuye iki gihugu; uwamubanjirije ni Mutagatifu Papa Yohani Pawulo wa Kabiri wasuye Kazakisitani kuva tariki 22-25 Nzeri 2001; kuba yari akuze cyane kandi arwaye ntibyamubujije gusura abatuye iki gihugu dore ko bari mu bihe bitoroshye by’iterabwoba.

Igihugu cya Kazakisitani gituwe n'umubare munini w'abayisilamu b'aba Sunni, gifite diyosezi gatolika eshanu ndetse n'abakristu babarirwa mu bihumbi 250,000. Ni imibare yavuye mu ibarura ryabaye mu 2008 igaragaza ko Abakristu Gatolika aribo bakeugereranyije n’abayoboke bo mu yandi madini mu baturage Miliyoni 18 batuye iki gihugu.Iri barura ryagaragaje ko Abayisilamu ari 70%, Abasengera mu yandi matorero ya Gikristu ari 25% naho Abakristu Gatolika bakaba ari1%. Kazakisitani ihana imipaka n'u Burusiya,Ubushinwa, Uzbekistan, Kyrgyzstan na Turkmenistan.