Papa Fransisiko yakiriye Perezida Emmanuel Macron witabiriye ihuriro rya 36 ryo gusabira Isi amahoro i Roma

Nk’uko vaticannews.va ibitangaza, ku isaha ya saa yine n’igice zo kuri uyu wa 24 Ukwakira 2022 nibwo Perezida Emmanuel Macron yageze i Roma ari kumwe n’umufasha we Brigitte Macron n’ababaherekeje, bakirwa na Nyirubutungane Papa Fransisiko mu nyubako ya Bazilika Nkuru ya Mutagatifu Petero, bagirana ibiganiro byihariye byamaze iminota 55.

Muri iyi gahunda, Papa Fransisiko yahaye Perezida Macron impano zirimo inyandiko igaragaza ibikomeje kuranga ibikorwa akora muri iki gihe nka Papa ndetse n’umudari. Perezida w’u Bufaransa Emmanuel Macron na we akimara kwakirwa, yahaye Papa Fransisiko impano irimo n’inyandiko yanditswe mu mwaka w’1795 n’Umufilozofe witwa Emmanuel Kant igaragaza umushinga wo kubaka amahoro arambye.

Ikinyamakuru Le monde cyatangaje ko Perezida Macron na Papa Fransisiko bateganya kugirana ibiganiro ku ngingo zitandukanye zirimo n’iyo intambara yo muri Ukraine. Biteganyijwe kandi ko Perezida Macron agirana ibiganiro na Karidinali Pietro Parolin umunyamabanga wa Leta ya Vatikani, ndetse na Minisitiri w’ububanyi n’amahanga wa Vatikani ari we Myr Paul Gallagher.

Ni uruzinduko rwa gatatu Perezida Emmanuel Macron agiriye i Roma kuva yatorerwa kuba Perezida w’u Bufaransa mu 2017. Ihuriro rigamije gusabira Isi amahoro rya 36 Perezida Macron yitabiriye i Roma rikaba ryarateguwe n’umuryango wa Saint Egidio.