Papa Fransisiko yasabye Abayobozi ba Kanada guteza imbere Uburenganzira bwa ba Kavukire

Ageze mu Mujyi wa Quebec, Papa Fransisiko yakiriwe n’abanyacyubahiro, abaturage

n’abayobozi muri Canada barimo Guverineri mukuru w’iki gihugu Mary Simon, anagirana

ibiganiro na Minisitiri w’intebe wa Canada Justin Trudeau, mu buryo bw’umuhezo.

Mu ijambo yagejeje ku bayobozi bakuru b’iki gihugu, abahagarariye ibihugu byabo ndetse

n’abahagarariye ba Kavukire muri iki gihugu; Papa Fransisiko yavuze ko Kiliziya Gatolika ku

isi, n’inzego zayo mu bihugu biyemeje guteza imbere imico gakondo y’abantu kavukire mu

bihugu byabo, bikazakorwa mu buryo bujyanye no kubaherekeza gikristu mu migenzo, imico,

indimi n’uburezi byabo; bikaba ari mu rwego rwo gushyira mu bikora Iteka ry’Umuryango

w’Abibumbye rirengera uburenganzira bwa ba Kavukire.

Akomoza ku mateka n’ibyaranze imibereho ya ba Kavukire muri iki gihugu mu bihe

bitandukanye, Papa Fransisiko yagize ati “Iyo ntekereje ku buryo bw’ihinduramitekerereze

(assimilation) bwakoreshejwe n’abakristu ndetse n’abayobozi b’igihugu binyuze mu burezi,

mbona bwarashegeshe ba Kavukire: mu gusuzugura umuco wabo, uburezi n’isura yabo mu

ruhando mpuzamahanga. Uburyo bwakoreshejwe muri ibyo bihe ntabwo bwari shyashya kuko

bwatumye abana bamwe batandukana n’imiryango yabo, abandi bajyanwa mu mashuri gatolika

hirya no hino,abanda bahasiga ubuzima.” Akavuga ko We, n’Abepiskopi bo muri iki gihugu

atewe isoni n’agahinda by’ibyakozwe n’abakristu bo muri iki gihugu, babikorera ba Kavukire.

Ko babikoze bagendeye ku mabwiriza ya gikoloni yari agezweho muri icyo gihe aho

kumurikirwa n’urumuri rw’ Ivanjili.

Papa Fransisiko yashimye uruhare igihugu cya Kanada kigira mu kwakira impunzi n’abimukira,

bahitamo kugihungiramo kubera ibibazo by’intambara n’imibereho mibi bikigaragara mu bihugu

byabo. Yashimye abayobozi b’iki gihugu kubwo umwanzuro bafashe ugamije kwakira impunzi

zavuye mu gihugu cya Ukraine yugarijwe n’intambara muri iyi minsi, ndetse n’abo muri

Afghanistan; agaragaza ko kugira umutima w’impuhwe wakira abari mu mage, bigahuzwa no

guhuza imico inyuranye y’abantu bavuye hirya no hino ku isi, bakakirwa hashingiwe ku

bushobozi bw’igihugu bigaragaza intumbero abahanze iki gihugu bahoranye maze mu ibendera

ryacyo bagashyiramo ikibabi cy’amashami atatu, n’amabara atandukanye.

Akomoza ku ntambara n’amakimbirane bikomeje kubuza bamwe amahwemo mu bihugu

bitandukanye byo ku isi, Papa Fransisko yavuze ko nta mpamvu yo gucamo isi ibice, abantu

bakagira bamwe abakunzi babo, abandi bakabagira abanzi babo; ko kurushanwa mu gukora

intwaro kirimbuzi kw’ibihugu ntacyo bimaze, ko atari byo bizageza isi ku mahoro n’umutekano;

ko igikenewe ari uguhagarika izo ntambara, abantu bagafatanya gushakira hamwe ibisubizo

by’ibibazo bindi byugarije isi biturutse ku mihindagurikire y’ikirere, ibyorezo n’abimukira

bava mu bihugu byabo bakajya ahandi.

Uruzinduko rwa gishumba rwa 37 rwa Papa Fransisko muri Kanada rwatangiye ku cyumweru

tariki 24 Nyakanga 2022, biteganyijwe ko ruzasozwa ku wa 30 Nyakanga 2022.