Papa Fransisiko yasabye Abihayimana bo muri Kanada guhanga Uburyo bushya bw’Iyogezabutumwa bujyanye n’ibihe isi igezemo
Ku munsi wa gatanu w’uruzinduko rwa gishumba ari kugirira mu gihugu cya Kanada, ku wa kane tariki 28 Nyakanga,Nyirubutungane Papa Fransisiko yahuye n’abihayimana bo muri iki gihugu barimo Abakaridinali, Abepiskopi, Abapadiri, Abafureri n’Ababikira. Ibiganiro byabereye muri Kiliziya ya Bazilika nkuru ya “Notre Dame de Quebec”.
Mu butumwa yabagejejeho, ku ngingo irebana n’icyo Kiliziya igomba gukora muri ibi bihe isi
yugarijwe n’ubuhakanyi, akenshi bushingiye ku ikoranabuhanga, Papa Fransisiko yibukije
abihayimna ko batagomba kwiganyira, ngo bemere ko isi ya none igoranye, itoroshye mu
butumwa bakora; ngo kuko Imana yabatoye itemera kuganzwa n’ibihe isi igezemo.
Abasaba gushira amanga mu butumwa bakora kuko Imana yabatoye ibana nabo kandi ibakomeza
kandi bagomba kugenza nkayo.
Akomoza ku cyo abihayimana bahamagarirwa gukora muri iki gihe, Papa Fransisiko yagize ati
“Mbere na mbere, tugomba guharanira ko Yezu amenyekana, tugasubira ku isoko y’ukwemera
kwacu. Tugashishikarira kugeza iyo nkuru nziza ku bantu bose, tukayigeza kubihebye
n’abahugijwe na byinshi muri iki gihe.”Akavuga ko ari ngombwa guhanga uburyo bushya
bw’iyogezabutumwa bujyanye n’ibihe isi igezemo kugira ngo babashe kugera mu mfuruka zose
abantu baherereyemo, hagakoreshwa uburyo bw’amajwi, amashusho,ibiganiro no kubageraho
imbonankubone.
Nk’uko vaticannews.va ibitangaza, Papa Fransisiko yasabye abihayimana gutsinda imbogamizi
Kiliziya igenda ihura nazo zigamije gusebya Ukwemera Gatolika, anabibutsa gusaba imbabazi
mu gihe hari bamwe muri bagenzi babo baguye mu byaha nko gusambanya abana cyangwa
guhohotera inzirakarengane. Avuga ko izi mbogamizi ahanini zibangamira ibyishimo
by’ubukristu, kuko iyo hari ingero z’ibitangenda neza zigaragaye bitera benshi kwibaza niba
Imana ikigaragariza muntu nk’uko ibyanditswe bitagatifu bibisobanura, cyangwa niba
byarahindutse.
Akomoza ku muco w’ubusumbane no gusuzugurana wakunze kugaragara mu mateka y’iki
gihugu, Papa Fransisiko yasabye abakuru ba Kiliziya muri iki gihugu guharanira ko iyi
myumvire yahinduka, abantu bakumva ko nta muco uruta indi; anasaba ko nk’uko ijya kurisha
ihera ku rugo, no mu ngo z’abihayimana ntawakagombye kumva ko aruta bagenzi be.Avuga ko
kubana neza kivandimwe kw’abasangiye ubutumwa bwa Kiliziya aribyo bizagaragaza ko
Kiliziya yigisha Ivanjili.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
