Papa Fransisiko yatangiye Uruzinduko rwa gishumba mu gihugu cya Bahrain
Mu gitondo cyo kuri uyu wa Kane tariki 3 Ugushyingo 2022, Umushumba wa Kiliziya Gatolika Papa Fransisiko yatangiye uruzinduko rwa gishumba mu gihugu cya Bahrain giherereye ku mugabane wa Aziya, akazarusoza ku wa 6 Ugushyingo uyu mwaka.
Nk’uko Vaticannews ibitangaza, mu museso wo kuri uyu wa kane nibwo Papa Fransisiko yuriye indege yerekeza ku mugabane wa Aziya, mu gihugu cya Bahrain mu ruzinduko rwe rwa 39 rwa gishumba. Biteganyijwe ko Papa Fransisiko azagirana ibiganiro n’umwami w’iki gihugu Ḥamad bin ʿĪsā Āl Khalīfa, mu murwa mukuru w’iki gihugu ariwo Manama.
Muri uru ruzinduko, Papa Fransisiko azitabira gahunda yo gusoza ihuriro ry’abahagarariye amadini n’imyemerere bateraniye muri iki gihugu muri gahunda y’ibiganiro mpuzamadini bigamije kubaka umuco w’amahoro; akazanagire umwanya wihariye wo kuganira Ahmad Al-Tayyeb, Imam mukuru wa Al-Azhar ari na we wateguye iri huriro.
Ni uruzinduko Papa Fransisiko agiye gukorera muri iki gihugu nyuma y’ubutumire yohererejwe n’umwami w’iki gihugu mu minsi ishize, bumusaba kuza kwifatanya n’abandi bahagarariye amadini anyuranye yo ku isi mu ihuriro(Forum) rigamije kuganirirwamo umuco w’ubwuzuzanye mu kubaka amahoro arambye ku isi(The peaceful coexistence forum) intego yayo ikaba ari kongera kwibutsa abantu ubumwe, ubufatanye n’amahoro hagati y’abadahuje imyemerere n’inkomoko.
Muri uru ruzinduko, Papa Fransisiko azasura Kiliziya Katedrali yaragijwe Bikira Mariya Umwamikazi w’ Arabia imaze umwaka 1 ishinzwe, anagirane n’abayobozi mu nzego za Kiliziya Gatolika muri iki gihugu barimo Abepiskopi, Abapadiri, Abiyeguriyimana n’abalayiki.
Biteganyijwe ko Papa Fransisiko azasura abakristu gatolika bo muri iki gihugu ndetse anature igitambo cy’Ukaristiya kizaturirwa kuri sitade y’igihugu, anagirane ibiganiro n’urubyiruko mu ishuri ryitiriwe umutima mutagatifu. Musenyeri Paul Hinder Intumwa ya Papa mu bihugu bya Leta Zunze Ubumwe z’Abarabu avuga ko uru ruzinduko ruzatanga icyizere n’ubufatanye Kiliziya Gatolika izitanye n’andi madini mu rwego rwo kubaka umuco w’amahoro ku isi.
Ikirwa cya Bahrain ni imwe mu bihugu bigendera ku migenzo y’idini ya Isilamu. Muri iki gihugu habarurwa abakristu gatolika bari hagati y’ibihumbi 80 -100, abenshi muribo bakaba ari abagiye kuhatura kubera impamvu z’akazi n’abimukira.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
