Papa Fransisiko yerekeje i Nur-Sultan muri Kazakisitani mu ruzinduko rwa gishumba

Nk’uko vaticannews.va dukesha iyi nkuru ibitangaza, ahagana ku i saa 7: 36 z’igitondo(A.M) nibwo Papa Fransisiko yafashe indege imwerekeza mu gihugu cya Kazakistani, bikaba biteganyijwe ko agera muri iki gihugu mu ma saa 5: 45 z’igicamunsi(PM).

Mu kiganiro yagiranye n'itangazamakuru kuwa Gatandatu tariki 29 Nyakanga 2022 ubwo yavaga mu ruzinduko yari yagiriye mu gihugu cya Kanada, Papa Francis yatangaje ko yifuza kugenderera kimwe mu bihugu by'Uburasirazuba bwo hagati.

Muri uru ruzinduko, Papa Fransisiko azanitabira Ihuriro mpuzamahanga rya karindwi ry’abahagarariye amadini ku isi(the VII Congress of Leaders of World and Traditional Religions), ihuriro rizabera mu mujyi wa Nur-Sultan, umurwa mukuru w’iki gihugu. Insanganyamatsiko y’iri huriro muri uyu mwaka iragira iti “The Role of Leaders of World and Traditional Faiths in the Socio-Spiritual Development of Humanity after the Pandemic".

Nk’uko byagaragajwe ku ngengabihe y’uru rugendo yatangajwe n’ibiro bya Papa bishinzwe itumanaho muri Kanama uyu mwaka, biteganyijwe ko ku wa kabiri tariki 13 Nzeri Papa Fransisiko ahura n’ abayobozi b’iki gihugu barimo Perezida n’abo bafatanya kuyobora, abagezeho n’ijambo.

Uru ruzinduko ruje nyuma y'ubutumire bw'abayobozi ba Kiliziya Gatolika muri Kazakisitani bari barasabye Nyirubutungane kuzagenderera iki Gihugu. Muri Mata uyu mwaka, Perezida wa Kazakisitani Bwana Kassym-Jomart Tokayev na we akaba yaratangaje ko Papa Fransisiko afite gahunda yo gusura iki gihugu n’ubwo atavuze igihe bizabera.

Papa Fransisiko ni uwa kabiri mu bashumba ba Kiliziya Gatolika ku isi basuye iki gihugu; uwamubanjirije ni Mutagatifu Papa Yohani Pawulo wa Kabiri wasuye Kazakisitani kuva tariki 22-25 Nzeri 2001; kuba yari akuze cyane kandi arwaye ntibyamubujije gusura abatuye iki gihugu dore ko bari mu bihe bitoroshye by’iterabwoba.