Papa Fransisiko yibukije abitaribiye Inama y’Abepiskopi bo mu Butaliyani ko urugendo rwa Sinodi y’Abepiskopi rugikomeje

Papa Fransisiko yabitangaje kuri uyu wa Kane tariki 25 Gicurasi 2023, mu nteko rusange ya 77 y’Inama y’Abepiskopi Gatolika bo mu Butaliyani, inama yabereye mu Ngoro yitiriwe Mutagatifu Pawulo wa Gatandatu.

Papa Fransisiko yagarutse ku isano ababatijwe bose baronka muri Batisimu, avuga ko muri iki gihe cya Sinodi Kiliziya ishyize imbere kugendera hamwe no gutega amatwi hatitawe ku byiciro by’abantu, inzego z’ubuyobozi muri Kiliziya cyangwa ku muhamagaro umuntu arimo, ahubwo buri wese akumva ko kubaka Kiliziya ari inshingano ze; byose bakabikora babwirijwe na Roho Mutagatifu.

Akomoza ku ruhare rwa Roho Mutagatifu mu gufasha abari muri uru rugendo rwa Sinodi kurukora neza, Papa Fransisiko yagize ati“Tugomba gusaba Roho Mutagatifu, akadufasha kumva no gusobanukira n’ubutumwa twahamagariwe, ndetse n’uko dukwiye kubukora muri Kiliziya yo muri iki gihe.”Avuga ko kugira ngo bigere ku bandi bigomba guhera kuri buri muntu ku giti cye.

Papa Fransisiko yavuze kandi ko urugendo rwa Sinodi Kiliziya irimo rusaba buri muntu kurukorana ibyishimo, guca bugufi n’ibitekerezo bishya bigamije gufasha bagenzi be kuko abantu bose ari abanyantegenke, bityo bakaba bakeneye gufashanya muri uru rugendo.

Ku musozo w’ubutumwa bwe, Papa Fransisiko yibukije abari muri iyi nama ko urugendo rwa Sinodi rutwibutsa twese nk’abakristu kwakira bose ntawe usigajwe inyuma; by’umwihariko muri ibi bihe isi yugarijwe n’ibibazo binyuranye, abantu benshi bafite ingorane zibabuza kwishima. Avuga ko abo bose bakeneye kubwira inkuru nziza y’Imana dusanga mu byanditswe bitagatifu, kugira ngo bumve ubutumwa bubaha ihumure rikomoka mu Mana, bakumva ko Kiliziya ari umubyeyi wa bose mu bumwe bw’abana b’Imana.