Paruwase yisunze Mt Andereya Gitarama yahimbaje umunsi mukuru w’ umutagatifu yaragijwe banishimira aho imirimo yo kuvugurura kiliziya yabo igeze.

Mu nyigisho Myr Balthazar Ntivuguruzwa yagarutse kuri ikicyumweru cya mbere cya Adiventi twatangiye uyu munsi. Myr yabifurije umwaka mushya wa kiliziya, kwitegura neza amaza ya Nyagasani barushaho kwegera Imana. Yabibukije batari bonyinye kuko turi kumwe n’Imana. Ati” Turi kumwe n’Imana igihe cyose, no mu bihe by’amage Imana turi kumwe no mu bihe za kiliziya zifunze nabwo Imana turi kumwe. Igihe cy’adiventi ni igihe cy’amizero, kitwibutsa ko Imana iduhora hafi no mu bihe bikomeye by’amizero Imana ntabwo ijya idutererana na rimwe.”

Yabasabye kugendera ku nama eshatu z’ingenzi muri iki gihe. Duhore twitonze, imitima yacu idatwarwa n’irari, Mube maso kandi musenge, ntimugire ubwoba. Ati”Hamwe na mutagatifu Andereya umurinzi wa Paruwase yanyu, akaba umwe mu bigishwa ba Yezu wabanye nawe, akamwitegereza akamutega amatwi kandi akagira ishyaka. Ni atubere urugero mu bukirisitu bwacu, tunyurwe na Yezu, tumurangamire kandi tumukunde.”

Myr Balthazar kandi yibukije abakristu ko icyumweru cya mbere cya Adiventi ari icyo gusaba amahoro mu karere kacu k’ibiyaga bigari, asaba abakristu ko isengesho ryacu kuri uyu munsi risaba amahoro ubumwe, n’ubwiyunge kuko tubikeneye mu ngo zacu, mu gihugu cyacu no mu karere kacu kugira ngo haganze amahoro n’umudendezo bikomoka kuri Yezu kristu umwami w’Ineza n’amahoro.

Yasabye abakirisitu ba paruwase yisunze Mt Andereya kutagira impungenge z’uko kiliziya yabo itazuzura kuko bafite Diyosezi ibakunda hamwe na Paruwase. Ati” Inkumga mwifuza muzayibona , kandi namwe mukomereze aho, kuko muri intwari zidahemuka. Ntimugacike intege, ntimugahemuke. Ibyishimo bidutegereje turabinyotewe ariko tuzabigeraho kandi bizaba bitegura ibyo Nyagasani aduteganyirije muri Yeruzaremu yo mu ijuru.”

Myr Balthazar yavuze ko abakristu ba Paruwase ya St Andre Gitarama bakeye (Smart), haba mu bitekerezo no mu gusabana. Yabibukije ko mutagatifu Andereya intumwa yarangwaga no gushabuka agahita abwira Yezu ibyo dukeneye byose. Yababwiye ko umurinzi w’iyi paruwase yakomeaz akababera ishema kandi akabasabira, nka Kiliziya iri mu Rugendo rwa Yubile. Ati” Iki ni igikorw cy’ubufatanye murimo kandi aho kiliziya igeze harashimishije. Ntimusubire inyuma, ntimucike intege, ntimushidikanye. Iki si igikorwa cyanyu mwenyine, ahubwo ni igikorwa cya Diyosezi yose. Yabasabye gukomeza ubufatante no gukomera kuko nta kinanira Imana.

Padiri mukuru wa Paruwase ya St Andre Gitarama Anatole NIYITANGA yavuze ko bishimiye gutangira iki gihe cya Adiventi bari kumwe n’umwepisikopi. Yatangarije myr ko banyotewe no gusengera muri kiliziya nshya bari hamwe bose barebana, bamwe batari hanze abandi mu nzu. Yavuze ko hamwe n’abakristu bose biyemeje gushaka abantu babatera inkunga yo kubaguriza amafranga yo gukora ibikorwa bikeya bisigaye, kandi bakaba biyemeje kuzafatanya kuzishyura uwo mwenda ariko intego yo gusengera muri kiliziya nshya kuri Noheli ikagerwa.

Uwimana Charlotte Umuyobozi w’Inama nkuru ya Paruwase yisunze mutagatifu Andereya Gitarama yavuze ko mbere na mbere bashimira Imana yabahaye uyu munsi. Mu izina ry’abakristu bose basabye Mutagatifu Andereya Umurinzi wa Paruwase yabo kubafasha bakamwigiraho kwitagatifuriza mu mirimo bakora no gusangiza abandi ibyiza bya Nyagasani. Gushinga imizi mu kwemera kugira ngo iyogezabutumwa rigere kuri bose. Ati ‘’Hari icyo tumusaba, turamusaba ngo adusabire gukomera mu kwemera, adusabire impano yo kuzasengera muri kiliziya nshya kuri Noheli , adusabire imbaraga zo gutegura neza ibyo twiyemeje muri Yubile , guha imbaraga imiryangoremezo , uturere na santarale zose zishobore gukora neza nta we usigaye inyuma.” Bamuhaye umukoro wo kubafasha kubona umushinga ubyara inyungu wafasha paruwase gutera imbere badakomeje gutega ibiganza.

Rukundo Emille umuyobozi wa komisiyo ishinzwe inyubako nawe yashimangiye ko uyu munsi bishimiye kwizihiza umunsi mukuru wa Mutagatifu Andereya umurinzi akaba n’umuvugizi wa Paruwase yabo. Barashimira Imana kubera aho imirimo yo kuvugurura iyi paruwase igeze . Yasabye abakristu gukomera ku isengesho, gushyiramo imbaraga , ubwenge n’ubushake kugira ngo kuri Noheli bazasengere muri kiliziya nshya.

Agaruka ku mabwiriza mashya y’insengero zujuje ibisabwa aherutse gutangazwa, Emille yavuze ko hari imirimo yiyongereye kubyo bari barateguye yatwaye asaga miliyoni 100 ziyongera kubyo bari barapanze. Ati” Turashimira Diyosezi yaduteye inkunga muri iki gikorwa, no mu mirimo yo gusukura kiliziya kugira ngo ibe nziza ku rushaho. Imirimo isigaye minini ni ibiri harimo gukora imbuga isa neza, no gushyiraho ubwiherero bujyanye n’igihe. Abakristu bakaba basabwa gukora imiganda bashyizeho imbaraga n’umwete. “ Yatangarije abakristu ko hakenewe miliyoni 30 kugira ngo bashobore gusengera muri Kiliziya nshya kuri Noheli. Avuga ko bari gushaka aho bakura iyi nkunga hanyuma yaboneka ikazaba ari umwenda bazasigara bishyura gahoro gahoro kandi n’ibikorwa byo kubaka kiliziya bikazakomeza.

Byiringiro Olivier umwe mu bakristu ba Paruwase yitiriwe Mutagatifu Andereya yavuze ko ari ibirori bateguye mu rwego rwogushimira Imana yabashoboje kuvugurura Kiliziya yabo, bakaba bafite ikizere ko bazayisengeramo kuri Noel. Yagize ati” Mutagatifu Andereya twisunze ntako atagira ngo aduhe ku byiza bye, twishimiye ibikorwa byose byarangiye mu kuvugurura Kiliziya yacu, kandi dufite ikizere ko n’ibisigaye tuzabishobora tubikesha isengesho ritaretsa no guhora dutakambira mutagatifu Andereya ngo abituvugire neza . Dufite inyota yo gusengera muri Kiliziya yacu.

Paruwase yaragijwe mutagatifu Andereya Gitarama iri mu myiteguro yo guhimbaza yubile y’imyaka 50, izahuzwa n’ibirori byo guhimbaza yubile y’impurirane kiliziya irimo, imyaka 125 ishize ivanjiri igeze mu Rwanda n’imyaka 2025 y’ugucungurwa kwa muntu. Mu kuvugurura iyi paruwase biteganyijwe ko izarangira itwaye amafaranga y’u Rwanda asaga Miliyoni 300. Ikazaba ifite ubushobozi bwo kwakira abantu bagera ku bihumbi 3000 bicaye neza.