Paruwasi Rambo: Mu myaka itatu ibyaye abapadiri batatu

Abavuka muri Paruwasi ya Rambo ni Padiri Andre Pascal Bana Nganzo ufite Intego igira iti “Nyagasani uzi byose uziko gukunda” na Padiri Pacifique Tuyambaze wahisemo intego igira iti “Muzambere Abahamya” mu gihe Padiri Pierre Bizimungu wahisemo intego igira iti “Ndemera Nyagasani” avuka muri Paruwasi ya Kivumu.

Nk’uko byagarutsweho na Bwana Pierre Celestin Ndarifite wavuze mu izina ry’Abakristu, mu myaka hafi itatu igiye kumara, Paruwasi ya Rambo yaragijwe Mutagatifu Aloyizi imaze kubyara abapadiri ubugira kabiri kuko muri 2023 yabyaye umupadiri umwe mu gihe uyu mwaka wa 2024 yabyaye impanga z’abapadiri.

Ibi nibyo Umwepiskopi wa Nyundo, Myr Anaclet Mwumvaneza yahereyeho ashimira Paruwasi ya Rambo na Kivumu ku kuba Rambo yarahagurutse neza ikaba igize abapadiri batatu mu myaka itatu imaze mu gihe na Paruwasi ya Kivumu ibyara umupadiri hafi buri mwaka.

Agenera by’umwihariko abahawe Ubusaserdoti, Musenyeri Anaclet yabibukije ko babaye ababyeyi kuko bagiye kujya baganwa na benshi bababonamo ababyeyi.

Ati “Kuva uyu munsi mwabaye ababyeyi. Mugiye kujya muganwa n’ingeri zinyuranye harimo n’ababaruta kubwo kubabonamo ababyeyi babo kugira ngo mubagire inama ndetse munabayobore ku Mana.”

Ibi yabihuje n’inshingano z’ibanze z’Umusaserdoti arizo; Kwigisha ijambo ry’Imana, Gutagatifuza imbaga y’Imana no kuyobora imbaga y’Imana.

Ati “Bityo rero bakristu, mujye mwibuka gusabira abasaserdoti kugira ngo babashe gusohoza inshingano zabo neza.”

Abapadiri bashya banahise bahabwa ubutumwa aho Padiri Andre Pascal yahawe ubutumwa muri Paruwasi ya Kora, Padiri Pierre ahabwa ubutumwa muri Paruwasi ya Mushubati mu gihe Padiri Pacifique yahawe ubutumwa muri Paruwasi ya Congo Nil.

Biteganyijwe ko muri uyu mwaka, Diyosezi ya Nyundo izibaruka abapadiri ikenda.

Paruwasi ya Rambo yakiriye ibirori by’Itangwa ry’Ubusaserdoti iherereye muri Diyosezi ya Nyundo, Zone Pastorale ya Gisenyi, ku nkengero z’Ikiyaga cya Kivu ifite, kugeza ubu ikaba ifite santarali ebyiri n’imiryangoremezo 38.