Paruwasi ya Kibuye yahimbaje Mutagatifu Petero Intumwa

Ni ibirori byabimburiwe n’Igitambo cya Misa cyayobowe na Padiri Evariste Uwintwari uyobora iyi Paruwasi.

Muri iki gitambo, Padiri Evariste Uwintwari yibanze ku byaranze Mutagatifu Petero Intumwa urutare Yezu yahisemo kubakaho Kiliziya ye.

Mu kiganiro Kinyamateka yagiranye na Padiri Evariste Uwintwari uyobora Paruwasi ya Kibuye, yagaragaje byinshi ku mateka ya Paruwasi Kibuye iri mu mwaka wayo wa 63.

Paruwasi ya Kibuye yashinzwe muri 1961, yubakwa na Padiri Kirish ari nawe wubakishije Home St Jean, ndetse n’izindi paruwasi zirimo Crête Congo Nil, Hanika na Nkanka. Icyo zihuriyeho nuko zose zubakishije amabuye kuva hasi kugeza hejuru.

Iyi Paruwasi yubatse mu Mujyi wa Kibuye, Umudugudu wa Gatwaro, Akagari ka Kibuye, Umurenge wa Bwishyura, Akarere ka Karongi, Intara y’Iburengerazuba.

Ni Paruwasi ihana imbibe na Paruwasi Mushubati mu majyaruguru, Birambo mu burasirazuba, Mukungu mu majyepfo, Gisovu na Mubuga mu majyepfo ajyana iburengerazuba mu gihe iburengerazuba bwayo hari Ikiyaga cya Kivu.

Mu gihe cya Jenoside yakorewe Abatutsi muri 1994, abakristu ba Paruwasi Kibuye babarirwaga mu bihumbi 20,000 gusa kubera Jenoside, ingaruka zayo n’abagiye bahindura amadini, iyi Paruwasi ifite abakristu basaga ibihumbi 12,000 babarizwa mu miryangoremezo 55, iri mu nama 15 zigize sanatarali eshatu.

Nk’uko Padiri Evariste akomeza abivuga, Kiliziya ubwayo ya Paruwasi Kibuye yiciwemo Abatutsi basaga ibihumbi 10,000 ari nayo yabaye imbarutso yo gutuma na bamwe mu bandi bakristu bari basigaye bahorana ipfunwe ryo gusubira mu Kiliziya yiciwemo Abatutsi.

Mu marembo ya Kiliziya hubatse Urwibutso rwa Jenoside rushyinguyemo bamwe mu baguye muri iyi Kiliziya.

Mu bijyanye n'Iyogezabutumwa, iyi pararuwasi imaze kwibaruka abapadiri 4 ndetse n’abiyeguriye Imana basaga 10.

Mu bindi bikorwa bijyanye no gufasha abaturage baturiye iyi Paruwasi, kugeza ubu ifite amashuri 10 ndetse n’andi mashuri abiri ababyeyi beguriye Kiliziya.

Iyi paruwasi ikorana bya hafi n’Ibitaro bikuru bya Kibuye kuko abapadiri babikoreramo ubutumwa ku buryo hari n’umuryangoremezo ugizwe n’abakozi banyuranye b’ibi bitaro wahashinzwe. Uwo muryangoremezo witwa Karoli Mukuru.

Uretse ibi, Abapadiri bakorera ubutumwa muri Paruwasi ya Kibuye banashinzwe gukurikirana bya hafi abakristu bari mu Nkambi ya Kiziba.

Ubusanzwe Mutagatifu Petero Intumwa ahimbazwa tariki 29 Kamena gusa Padiri Uwintwari avuga ko bahisemo gusubika uyu munsi kubera ko tariki bawuhimbazaho yahuriranye na gahunda y’Umukuru w’Igihugu warimo yiyamamariza mu Karere ka Karongi.