Perezida Sergio Mattarella w’u Butaliyani yegukanye igihembo cyitiriwe Papa Paul VI

Ni igihembo gihabwa umuntu wabaye indashyikizwa mu guteza imbere iyobokamana mu mvugo no mu ngiro cyitiriwe Papa Paul VI, uzwi ku izina rya Papa Montini cyashyizweho n’ikigo cya “The Paul VI Institute”mu 1979.

Mu ijambo yagejeje ku bitabiriye uyu muhango wabereye mu ngoro yitwa ya “The Vatican Clementine Hall”, Papa Fransisiko yashimye uruhare rwa Papa Paul VI mu itegurwa ry’Inama nkuru ya Kiliziya ya Vatikani II, amushimira ko yafashe iya mbere mu kwemeza ko abalayiki nabo bagira uruhare mu bikorwa bya Kiliziya.

Akomoza ku ruhare rwa Perezida Mattarella mu miyoborere myiza no guteza imbere iyobokamana, Papa Fransisiko yagize ati “ Umuntu ubaho ntacyo afasha abandi, aba ameze nk’utariho. Uyu ni umwanya wo kwishimira no gushimira Perezida Matterella ugaragaza uburyo buhebuje bw’imibereho, mu gushyira imbere ibifitiye abandi akamaro kurusha inyungu ze bwite yabibonamo.” Papa Fransisiko yagaragaje kandi uko ibikorwa bya Politiki bidakwiye gutambamira amahame remezo y’urukundo, ahubwo urukundo rukaza imbere mu bikorwa bya Politiki.

Papa Fransisiko yakomeje avuga ko gutanga serivisi nziza bijyana no kumenya inshingano, umntu akakira abamugana uko bikwiye, n’ineza maze bakabona ibyabazinduye atabanje kubohereza ahandi.Avuga ko uyu mugenzo ariwo waranze Papa Paul VI, asaba abantu gukomera kuri uyu murage.