Ruhango ikomeje kuba ihuriro ry'abiyambaza impuhwe z'Imana
Nk'uko bimaze kumenyerwa, buri cyumweru cya mbere cya buri kwezi, abakristu baturutse imihanda yose bahurira mu Ruhango mu kibaya cy'amahoro, mu isengesho ryo kwiyambaza Yezu Nyirimpuhwe.
Ubwinshi bw'abitabira iri sengesho ntibuhwema kwiyongera. Abagana muri aka gace k'amajyepfo y'u Rwanda bibonera uko biba bitoroshye kubona imodoka iva i Kigali cyangwa ahandi ijya mu majyepfo y'u Rwanda, iyo habaye isengesho ryo mu Ruhango.
Ikindi kigaragara muri iri sengesho ni uko rihuza abantu b'ingeri zose, ari abato n'abakuru, abakire n'abakene, abakristu n'abatari bo, bose bahuzwa n'impuhwe za Yezu maze bakishima kandi bakoroherwa imitwaro y'ubuzima.
Mu nyigisho Padiri Alexis yagejeje ku bitabiriye isengesho ryo kuri iki cyumweru tariki 3 Nyakanga 2022, yagarutse ku cyo imbaga y'abagana Ruhango baza bashaka. Avuga ko abakristu baza ari benshi mu Ruhango kwereka Nyagasani imisaraba n'ingorane ngo yakire amaganya n'agahinda maze abahe amahoro n'ibyishimo.
Uretse inyigisho ihumuriza abatewe igihunga cy'ubuzima zitangirwa mu Ruhango, abajya mu Isengesho mu Ruhango bagira umwanya wo gushengerera Yezu mu Ukarisitiya bakamusingiza kandi bakamutura ingorane z'amoko yose zibugarije zikababuza amahoro y'Imana n'ibyishimo.
Kubera ukwemera n'umutima wo kwegerana na Yezu kurushaho uranga abagana Ruhango, benshi babohoka ku ngoyi nyinshi maze bagakira ibibagoye babikesha impuhwe z'Imana.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
