Seminari nkuru ya Nyakibanda yahimbaje umunsi mukuru wa Mutagatifu Karoli Boromewo yaragijwe.

Ibi birori byitabiriwe n’abashyitsi batandukanye barimo Myr Filipo Rukamba umwepisikopi wa Diyosezi ya Butare, Myr Balthazar NTIVUGURUZWA, Umwepisikopi wa Diyosezi ya Kabgayi ari nawe ushinzwe abasaseredoti na za seminari, Myr Papias Musengama wa Byumba, Myr Vincent Harolimana, Umwepisikopi wa Diyosezi ya Ruhengeri, Myr Smaragde Mbonyintege umwepisikopi wa Kabgayi uri mu kiruhuko cy’izabukuru, Umuyobozi w’akarere ka Huye Ange SEBUTEGE , Abapadiri bayobora za seminari mu Rwanda, abapadiri banyuze muri iyi seminari n’abayobozi b’izindi nzego z’ibanze mu karere ka Huye.

Myr Balthazar NTIVUGURUZWA, umwepisikopi wa Diyoze ya Kabgayi akaba n’umuyobozi wa komisiyo ishinzwe abasaseredoti na za seminari mu Nama y’Abepisikopi Gatolika mu Rwanda, ari nawe wayoboye Igitambo cya Misa cyabimburiye ibirori, yagarutse ku mateka ya Neminari nkuru ya Nyakibanda n'umubano n’ibanga ifitanye na mutagatifu karoli Boromewe yisunze.

Ati “Mutagatifu Karoli Boromewo yaje nk’impano muri Kiliziya ya Nyagasani. Yaje mu gihe Kiliziya yari icyenewe guhumurizwa. Yaritanze mu guha isura nziza amaseminari menshi ku isi harimo n’iyi ya Nyakibanda no kwita ku burere bw’abitegura kuba abasaseredoti kandi akabihuza n’ubuzima barimo. Yabaye umushumba mwiza amenya icyo intama za Nyagasani zari zikeneye mu gihe cye aragishaka arakibona. Yabaye urumuri rumurikira amaseminari menshi abafasha no kugera ku ntego zoyo zo kuba abigishwa ba Kristu koko."

Myr Balthazar yakomeje avuga ko buri gisekuru kigira ibihe byacyo, Ati” Ubu natwe dufite ibihe byacu kandi bitwaye amizero ariko biteye n’impungenge. Uburere bw’abaseminari nabwo bugomba kuvugururwa kugira ngo dutegure abaseminari kuzaba abasaseredoti beza muri iki gihe turimo . Ariko na none twibaze, ese koko turi abashumba ibi bihe bikeneye, babereye udutora ari we Nyagasani? Tuzi nezase ibibazo isi ya none irimo muri iki gihe?"

My Balthazar yibukije umurage wa mutagatifu Karoli Boromewo ugira uti” Mu buntu n’ubupfura bw’umutima , mukere gukorera Imana kuko tuyikunda, Niyo yonyine soko, ndunduro n’ingororano y’urukundo tuyifitiye,ndifuza ko muharanira gusohoza no kwihanganira ubutumwa Imana ibaha, Imana niyo yonyine tugomba kuruhira, niyo yonyine tugomba gukorera muri kiriziya ye.”

Yakomoje kandi ku Ibanga ryafashije Mutagatifu Karoli Boromewo gushaka no kubona ibisubizo bikwiye ari ikiganiro yagiranaga n’Imana. Asaba abaseminari kwivugurura kugira ngo bazabere abandi igisubizo ku rugero rwa Karoli Boromewo.

Ati”Baseminari mwitegura kuba abasaseredoti, Mbere y’uko umushumba amenya intama aragiye agomba kubanza kwimenya we ubwe,Mutagatifu Karoli Boromewo yabyumvise mbere kandi abigira intego, yabanje guhinduka we ubwe mu bwicishe bugufi no mu rukundo rwinshi no mu bwitange. Ubutungane n’ishyaka yabivomaga mu isengesho. Niba ubuzima bwanyu budashinze imizi mu ishengerera, mu isengesho no mu ijambo ry’imana , ibyo mwavuga byose, ibyo mwakora byose byaba ari nk’icyuka gusa, nta cyerekezo byaba bifite cyangwa bitanga.”

Diyakoni Anastase Musabyimana wo muri Diyosezi ya Kabgayi yabwiye Kinyamateka ko ku baseminari bose umurage wa Karoli Boromewo umurinzi wabo ari ntagereranywa kuko yaranzwe n’urugero rwiza rwo kwicisha bugufi no kubaha kandi akaba umuhanga, bityo ko nabo bahora bashishikariye kumureberaho.

Seminari nkuru ya Nyakibanda yashinzwe tariki ya 22/10/1936 iragizwe mutagatifu Karoli Boromewo wizihizwa ku 04 /11 buri mwaka. Ku rutonde rusange imaze kunyurwamo n’abapadiri basaga 1558 bahasoreje amasomo mu bijyanye na Teworojiya.