Urubyiruko rwo muri Paruwasi zaragijwe Abafaransisikani rurasabwa gukurana umuco w’amahoro no kwita ku bidukikije

Kuva ku ya 26 kugera ku ya 29 Ukuboza 2025, urubyiruko rusaga 300 rwaturutse muri Paruwasi enye zaragijwe Abafaransisikani rwahuriye mu Ihuriro ry’Urubyiruko (Fransiscan Youth Forum on Peace, Fraternity and Ecology) ryabereye muri Centre Padiri Vjeko Tvt Schook i Kivumu, muri Diyosezi ya Kabgayi.

Iri huriro ryitabiriwe n’urubyiruko rwo muri Paruwasi ya Kivumu (Diyosezi ya Kabgayi) ari nayo yabakiriye, Paruwasi ya Karama (Arkidiyosezi ya Kigali), Paruwasi ya Mbazi (Diyosezi ya Butare) na Paruwasi ya Nyarunyinya (Diyosezi ya Gikongoro). Izi Paruwasi zihurizwa ku kuba zose zikorerwamo ubutumwa n’umuryango w’Abafaransisikani, ukurikiza urugero rwa Mutagatifu Faransisiko w’Asize.

Insanganyamatsiko y’iyi Forum yagiraga iti “Twagira isi nziza ari uko dufite amahoro” (A Safe Earth Grows a Peaceful World). Urubyiruko rwasabwe kuba abubatsi b’amahoro n’ubuvandimwe, no kugira uruhare rufatika mu kurinda ibidukikije, bifatwa nk’umuvandimwe w’umuntu nk’uko Mutagatifu Faransisiko yabigishaga.

Padiri Jean Eric Mutabazi, ushinzwe Komisiyo y’Ubutabera n’Amahoro mu muryango w’Abafaransisikani mu Rwanda no mu Burundi, ari na we wari uyoboye itegurwa ry’iyi Forum, yavuze ko bishimiye intambwe yatewe, cyane ko ari ku nshuro ya mbere ihuriro nk’iri riteguwe ku rwego rw’igihugu.

Yagize ati“Twifuje guha urubyiruko inyigisho zibafasha kubaka umuco w’amahoro, kwita ku bidukikije no kwihangira imirimo. Umuntu udafite icyo akora byoroshye kumuyobya, ni yo mpamvu twateguye ibiganiro bibafasha kugira icyerekezo cyiza cy’ubuzima.”

Padiri Mutabazi yasobanuye ko bahisemo kwibanda ku rubyiruko kubera ko ari rwo rugerwaho cyane n’ingaruka z’intambara n’amakimbirane, kandi ari na rwo rworoshye gushukwa. Yagaragaje ko gutegura urubyiruko hakiri kare ari ugukumira ibishobora guhungabanya ejo hazaza h’igihugu na Kiliziya.

Mu rwego rwo gushyira mu bikorwa ubutumwa bwo kwita ku bidukikije, urubyiruko rwitabiriye Forum rwateye ibiti bisaga 600, hagamijwe kubungabunga ibidukikije no gutanga umusanzu mu guhangana n’ihindagurika ry’ikirere. Basabwe gukomeza kuba urugero rwiza mu baturage aho batuye.

Padiri Mutabazi yasabye kandi urubyiruko gukoresha ikoranabuhanga n’imbuga nkoranyambaga mu kubaka amahoro aho kuyasenya, abibutsa ko amagambo yuzuye ubugizi bwa nabi ashobora guteza amakimbirane, cyane cyane mu rubyiruko.

Uretse inyigisho, iyi Forum yanabaye umwanya wo kugaragaza impano z’urubyiruko binyuze mu mivugo, indirimbo, imbyino n’ikinamico, ndetse hanabaho imikino inyuranye irimo Volleyball na Basketball, byafashije urubyiruko kurushaho kumenyana no kubaka ubumwe.

Urubyiruko rwanagize umwanya wo kuzirikana mu isengesho, gushengerera Yezu mu Isakaramentu ry’Ukaristiya Ntagatifu no guhabwa Penetensiya, hagamijwe kwita ku buzima bwa roho n’ubw’umubiri, nk’uko bikwiye mu myiteguro y’umuntu wuzuye.

Mu buhamya bw’urubyiruko, abaturutse muri Paruwasi ya Nyarunyinya bavuze ko bishimiye guhura n’urubyiruko rw’ahandi no gutera ibiti, biyemeza gukomeza umuco wo kurinda ibidukikije no mu duce batuyemo.

Naho urubyiruko rwo muri Paruwasi ya Karama rwatangaje ko rwungukiye cyane ku nyigisho zerekeye kubaka amahoro ku mbuga nkoranyambaga, rwemeza ko rugiye kujya rukoresha amagambo meza, yubaka aho gusenya.

Mu gusoza Forum, buri Paruwasi yahawe umupira w’amaguru, mu rwego rwo gukomeza ubumwe n’imikoranire. Urubyiruko rwasabye ko iyi Forum yaba ngarukamwaka, icyifuzo umuryango w’Abafaransisikani wemeye gushyira mu bikorwa.

Padiri Mutabazi yifurije urubyiruko umwaka mushya w’amahoro, w’uburumbuke, w’ibidukikije bifite ubusugire, amazi meza n’umwuka mwiza, ashimangira ko umuryango w’Abafaransisikani uzakomeza kuba hafi y’urubyiruko mu kururemera ejo hazaza heza.