Urugendo rwa Sinodi y’Abihayimana bo muri Arkidiyosezi ya Kigali

Nyuma y’uko ibikorwa bwa Sinodi y’Abepiskopi 2023 bikorewe mu nzego z’ibanze za Kiliziya, ni ukuvuga imiryangoremezo, amatsinda y’abasenga, amakorali, ku rwego rwa santarali na paruwasi ndetse no mu miryango z’abihayimana; ku wa Gatandatu, tariki 6 Kanama 2022; Abihayimana bo muri Arkidiyosezi ya Kigali bateraniye mu kigo cya Mutagatifu Fransisiko kiri ku Kicukiro baganira ku butumwa bakora n’uko barushaho kugendera hamwe nk’uko bikubiye mu ntego ya Sinodi y’Abepiskopi. Iyi gahunda ikaba yaritabiriwe na Nyiricyubahiro Antoni Karidinali Kambanda, Arkiyepiskopi wa Kigali.

Mu ijambo ryo gutangiza uwo munsi, Antoni Karidinali Kambanda yibukije icyifuzo cya Nyiributungane Papa Fransisiko cyo gutegana amatwi bamwe ku bandi. Nyuma y’ubutumwa n’ibiganiro byatanzwe na bamwe muri aba bihayimana; hakurikiyeho umwanya wo kuganira mu matsinda no gusangira ibitekerezo.

Mu biganiro byavuye mu matsinda, abihayimana bahamije ko bari ku ruhembe mu butumwa bwa Kiliziya,ibyo bigaragarira mu bikorwa binyuranye bakora : ubuvuzi, uburezi, kwita ku bakene, ubwigishwa, gutega amatwi ababikeneye, no gufasha abakristu kubona amasakramentu. N’ubwo buri muryango ufite umwihariko w’ubutumwa muri Kiliziya rusange, buri muryango uhamagarirwa kubaho mu bumwe na Kiliziya kugira uruhare mu butumwa bwayo.

Abihayimana bahamagariwe kongera kugaruka ku isoko bagashishikarira isengesho, gusoma ijambo ry’Imana n’inyigisho za Kiliziya. Arkiyepiskopi wa Kigali yibukije abihayimana gusenga. Ko isengesho ritiza imbaraga umutima, rikaba urukingo rufasha umuntu mu kubaho neza muri ubu buzima.

Arkidiyosezi ya Kigali ibarizwamo umubare munini w’abihayimana bibumbiye mu miryango itandukanye. Ingo zabo ziri hirya no hino mu maparuwasi hafi ya yose ayigize. Uyu munsi ukaba waritabiriwe n’abihayimana 154 bo mu miryango itandukanye.