Abadoratrice batangiye urugendo rwa Yubile y’Imyaka 200 y’ukuvuka mu Ijuru k’Umuhire Beata Maria Magdalena

Igitambo cya Misa yo gutangira uru rugendo cyabereye muri Paruwasi ya Kagugu ari naho habarizwa ikigo cy’aba babikira.

Ari kumwe na Padiri Mukuru wa Paruwasi ya Kagugu, Myr Jean Claude Muvandimwe, Padiri Lambert Dusingizimana, Umunyamabanga mu biro by’Inama y’Abepiskopi bishinzwe uburezi niwe wayoboye Misa yo gutangira uru rugendo.

Mu nyigisho yatanze, Padiri Lambert yavuze ko abakristu bakwiye gufatanya n’uyu muryango mu gushengerera Yezu Kristu mu isakaramentu ry’Ukaristiya.

Ati “Isakaramentu ni Urwibutso rw’urukundo rw’Imana yadukunze.”

Yakomeje asaba abakristu kwimika Yezu n’isengesho mu buzima bwabo bwa buri munsi.

Yagize ati “Twumve agaciro tugomba guha ukaristiya, agaciro tugomba guha isengesho mu mibereho yacu, biherekeze ubuzima bwacu. Ntitube ibigwari ahubwo turangwe n’ineza, Yezu aduherekeze muri iryo sengesho.”

Nkuko byagarutsweho na Padiri Dusingizimana, iyi yubile izarangwa n’ibikorwa by’urukundo, isengesho ryihariye, gushengerera no kugendana n’abashengerera, no gusaba imbabazi kugira ngo abantu babashe kuronga indulgensiya.

Umwe mu babikira b’abadoratrice yabwiye Kinyamateka ko intego yabo y’ibanze ari ugushengerera Yezu mu Isakaramentu ritagatifu ubutaretsa.

Yagize ati “Nkuko uwashinze umuryango yakunze Ukaristiya akiri muto, akemera gusiga byose agakurikira Yezu, natwe ubutumwa bwacu ni ugushengerera Yezu ijoro n’amanywa.”

Yakomeje avuga ko n’abalayiki bakunda Yezu mu Ukaristiya badahejwe kuko uyu muryango ufite n’igice cy’abalayiki bakunda gushengerera Yezu mu Isakaramentu ritagatifu.

Uyu mubikira yavuze ko ibizaranga uru rugendo rw’umwaka birimo; isengesho ryihariye, gushengerera Yezu Kristu mu Ukristiya ubutaretsa, ibikorwa by’urukundo no gusaba imbabazi kugira ngo babashe kuronga indulgencia.

Yasoje asaba abakristu gufatanya mu gukunda Yezu mu Ukaristiya, gusabira Isi, gusabira abarwayi, no gusabira abantu benshi bafite Ibibazo bitabonerwa ibisubizo.

Umuryango w’Abashengerera Iteka isakaramentu ritagatifu ry’Ukaristiya, washinzwe na Mariya Madalena w’Ukwigira Umuntu kwa Jambo.

Beata Mariya Magdalena washinze uyu muryango yavukiye ahazwi nko ku birwa bya Mutagatifu Stefano mu Butaliyani, ku wa 16 Mata 1770.

Ku wa 26 Ukwakira 1788, nibwo Magdalena yambitswe umwambaro w’abihaymana mu muryango wa Mutagatifu Francisko wa Asizi.

Ku wa 19 Ugushyingo 1789 nibwo Magdalena yashinze umuryango w’abihayimana bashengerera kandi bataramira Yezu mu Isakaramentu ritagatifu ijoro n’amanywa imbere ya Taberenacle.

Uyu muryango ukimara gushingwa wahuye n’ibitotezo byinshi ku buryo ku wa 19 Werurwe 1814 aribwo inzu ya mbere y’abashengerera iteka yafunguwe I Roma.

Kuva ubwo kugeza ubu, hari za monasiteri mu bihugu bitandukanye birimo Ubutaliyani, Esipanye, Austria, Kenya, u Rwanda n’ibindi.

Mu Rwanda, uyu muryango wahageze muri 2010, aho ufite ikigo kimwe giherereye muri Paruwasi ya Kagugu.

Abanyarwanda bari muri uyu muryango ni 35 barimo 12 basezeranye amasezerano ya burundu.

Biteganyijwe ko ku wa 29 Ugushyingo 2024 aribwo hazahimbazwa Yubile y’Imyaka 200 y’ukuvuka mu ijuru kwa Beata Mariya Magdalena washinze Umuryango w’ Abashengerera Iteka isakaramentu ritagatifu ry’Ukaristiya.