Abapadiri bashinzwe urubyiruko bahawe amahugurwa ku kurwanya ibiyobyabwenge

Aya amahugurwa yitabiriwe n’abapadiri 55 baturutse ma maparoisse abarizwa mu turere twa Nyamasheke, Rusizi, Karongi, Gakenke, Rulindo, Nyarugenge na Gisagara, atangizwa na Nyiricyubahiro musenyeri Servilien NZAKAMWITA, umwepisikopi ucyuye igihe wa Byumba akaba na Perezida wa Komisiyo y’Abepisikopi ishinzwe icyenurabushyo ry’urubyiruko. Ni amahugurwa yateguwe n’ikigo cy’igihugu gishinzwe ubuzima ( RBC) ku bufatanye na Komisiyo y’Abepisikopi ishinzwe Ikenurabushyo ry’Urubyiruko, aterwa inkunga n’ikigo cy’Ububiligi gishinzwe iterambere ( ENABEL), biciye mu mushinga BARAME ukorera mu turere twavuzwe haruguru.

Mu gufungura aya mahugurwa, Mgr Servilien NZAKAMWITA yavuze ko ibiyobyabwenge ari kimwe mu byonnyi bikomeye byugarije urubyiruko kandi bikica ubuzima bwarwo. Yibukije ko umujene wasabitswe n’ibiyobyabwenge adashobora kubaka umuryango uhamye kandi ko abera umuzigo umuryango, Kiliziya n’igihugu. Aha niho yahereye yerekana ko aya mahugurwa aziye igihe kandi akaba yari akenewe cyane kuko azongerera ubumenyi abapadri bashinzwe Urubyiruko bityo bakazabasha gusigasira ubuzima bw’abo bashinzwe. Mgr Servilien NZAKAMWITA yashimiye cyane abateguye amahugurwa kandi abasezeranya ko ubumenyi abapadiri bazakuramo butazaba infabusa ahubwo ko bazabugeza no ku bandi cyane cyane ku bajene bahagarariye abandi.

Muri aya mahugurwa hatanzwe amasomo atandukanye yagarukaga cyane ku bubi bw’ibiyobyabwege, ingaruza zabyo n’uburyo butandukanye bwagiye bushyirwaho mu rugamba rwo kubirwanya no gufasha ababikoresheje.

Mu masomo yatanzwe muri aya mahugurwa harimo: Impamvu ziganisha ku ikoreshwa

ry’ibyiyobyabwenge; Ingaruka z’ikoreshwa ry’ibiyobyabwenge; Uburyo bw’ingenzi bwo gufasha umuntu ukoresha ibiyobyabwenge; Ingamba Leta yashyizeho mu kurwanya ibiyobyabwenge; Mu bindi biganiro n’amasomo byatanzwe harimo: ibisobanuro by’ikiyobyabwenge n’amoko yabyo, intera z’ingenzi mu ikoreshwa ry’ibiyobyabwenge (use, Abuse, Tolerance, Addiction), ibyiciro by’ibiyobyabwenge biboneka mu Rwanda (ibyoroshye, ibikomeye, ibihambaye), imibare y’abakoresha ibiyobyabwenge mu Rwanda, ibimenyetso biranga uwabaswe n’ibiyobyabwenge, intera zo gusohoka mu ikoreshwa ry’ibiyobyabwenge.

Abapadiri bahuguwe bishimiye ubumenyi bahawe kandi biyemeza kuzabukoresha mu bikorwa bitandukanye basanzwe bakora mu ikenurabushyo ry’urubyiruko. Bimwe mu byo biyemeje kuzashyiramo imbaraga twavuga nko guhugura inzego zitandukanye z’urubyiruko mu madiyosezi n’amaparuwasi kugira ngo abazigize bagire ubumenyi buhagije ku kibazo cy’ikoreshwa ry’ibiyobyabwenge n’uburyo bwo gufasha ababaswe nabyo, gukora ubukangurambaga bwo kurwanya ibiyobyabwenge biciye mu mahuriro y’urubyiruko, gushyiraho no gushyigikira amatsinda na clubs zo kurwanya ibiyobyabwenge, gushyiraho uburyo bufasha urubyiruko mu myidagaduro na siporo kugira ngo bave mu bwigunge ndetse binabarinde kujya mu bigare, Gutegura amarushanwa mu ndirimbo imivugo n’ibindi bihangano bihamagarira urubyiruko kwamagana ikoreshwa ry’ibiyobyabwenge, Guha ubujyanama abahuye n’ikibazo cy’ikoreshwa ry’ibiyobyabwenge kugira ngo babafashe kugaruka mu buzima busanzwe,…

Mu gusoza aya mahugurwa uwari uhagarariye RBC, Edmond DUFATANYE, yashimangiye ko ikoreshwa ry’ibiyobyabwenge ari ikibazo gihangayikishije abantu bose n’inzego zose ko ari nayo mpamvu kubikumira no kubirwanya ari inshingano ya buri wese. Yerekanye ko kubera uburemere bw’ikibazo cy’ikoreshwa ry’ibiyobyabwenge ndetse n’ingaruka zikomeye bigira, hakenewe ubufatanye bw’izo nzego zose mu gukumira ikoreshwa, ikwirakwizwa, n’icuruzwa ry’ibiyobyabwenge. Yasabye abapadiri bahuguwe kugira uruhare muri urwo rugamba bagakoresha cyane cyane ubumenyi bahawe mu gufasha ababaye imbata z’ibiyobyabwenge kandi ubwo bumenye bakabugeza no ku bandi.

Bwana François Régis HABARUGIRA wari uhagarariye ENABEL muri aya mahugurwa yashimiye Kiliziya gatolika uruhare igira mu bijyanye no kwita ku buzima bw’abantu cyane cyane urubyiruko. Yashimiye abapadiri bitabiriye amahugurwa kuba barabonetse, bagatanga ibitekerezo bitandukanye kandi bakiyemeza no gushyira imbaraga mu kwita ku kibazo cy’ikoreshwa ry’ibiyobyabwenge mu rubyiruko. Yabijeje ko ikigo ahagarariye kizakomeza kubashyigikira mu bikorwa bitandukanye byo kubungabunga ubuzima bw’urubyiruko kugira ngo twizere ko ejo tuzaba dufite abayobozi beza muri Kiliziya no muri sosiyete.

Mu ijambo ryo gusoza aya mahugurwa, Padiri Evariste NSHIMYUMUREMYI, umunyamabanga mukuru w’akanama k’abepisikopi gashinzwe ikenurabushyo ry’urubyiruko(CEPJ), yashimiye RBC na ENABEL bagize uruhare rukomeye mu guhugura abapadiri. Yasabye abapadiri bahuguwe kwifashisha ubumenyi bakuye muri aya mahugurwa mu gusanga intama zazimiriye mu biyobyabwenge no kuzigarurira icyizere cy’ubuzima. Yijeje abari aho bose ko Kiliziya gatolika mu Rwanda ibinyujije muri Komisiyo y’Abepisikopi ishinzwe ikenurabushyo ry’urubyiruko, itazahwema gukora igishoboka cyose ngo ibungabunge imibereho myiza y’urubyiruko cyane cyane irurinda ibiyobyabwenge.