Amashuri Gatolika yakemura ikibazo cy'umutekano muke mu Biyaga bigari
Myr Visenti Harolimana avuga ko Amashuri Gatolika afite ubushobozi bwo gukemura ikibazo cy'Amacakubiri n'umutekano muke byabaye akarande mu Karere k'Ibiyaga bigari.
Ibi yabitangaje kuri uyu wa 18 Gashyantare 2025, mu gikorwa cyo gutangiza Inama nyunguranabitekerezo ku ruhare rw'uburezi gatolika mu cyerekezo cy'Igihango cya Papa cy'Uburezi n'Igihango nyafurika cy'Uburezi Gatolika.
Muri iyi nama yahuje abahagarariye uburezi Gatolika mu bihugu by'u Rwanda, u Burundi, RD Kongo na Guinée Equatoriale, Myr Visenti yibukije ko ishuri Gatolika rifite ubutumwa bwo gufasha Kiliziya kubaka ubuvandimwe no guca amacakubiri n'umwiryane mu bantu, by'umwihariko mu Biyaga Bigari.
Yagize ati"Papa Fransisiko asaba ko ishuri gatolika ryafasha abana kutaba abo guhangana byo gukurura bishyira ahubwo bakaba abubaka ubuvandimwe na sosiyete ishyize hamwe. Uburezi bwiza ni amizero y'umubano mwiza muri Afurika."
Myr Visenti Harolimana, yashimiye abitabiriye iyi nama, baturutse mu bihugu bitandukanye, ndetse usanga mu bya Politiki bidacana uwaka, avuga ko Kiliziya ari ikimenyetso cy'ubumwe bw'abwntu bose.
Ati"Kuba muri hano ni ikimenyetso cy'ubumwe n'ubuvandimwe, Kiliziya ibereye igikoresho n'ikimenyetso, nk'uko bivugwa na Vatikani ya kabiri: Kiliziya ni ikimenyetso cy'ubumwe bw'abantu bose."
Myr Visenti yaboneyeho kwihanganisha imiryango ikomeje gushegeshwa n'intambara imaze imyaka mu Burasirazuba bwa Kongo, avuga ko ishuri Gatolika ari igikoresho kiza cyatuma izi ntambara z'urudaca zicika burundu ribaye rigiriwe icyizere.
Ati"Tugirire ikizere ishuri gatolika kuko rifite ibishoboka byose ngo rifashe aka karere kuba Akarere kuje amahoro, ubwumvikane n'ubuvandimwe."
Ibitekerezo (0)
- Nta gitekerezo kirahaba. Ba uwa mbere utanga igitekerezo.
