Amateka I Vatikani: Umwami w’u Bwongereza Charles III n’umwamikazi Camilla basengeye hamwe na Papa Leo XIV.

Zimwe mu mpamvu zishimangira ko ari amateka akomeye kuba umwami w’ubwongereza yakoreye isengesho mu ruhame hamwe n’umushumba wa Kiliziya gatolika ku isi harimo kuba iki gikorwa kitaherukaga kuba hakaba hari hashize imyaka 500. Kuva mu gihe cy’umwami Henry VIII mu 1534, ni bwo Kiliziya y’u Bwongereza yatandukanye na Kiliziya Gaturika, Umwami agirwa “umutware mukuru wa Kiliziya y’u Bwongereza.”

Kuva icyo gihe, umubano hagati ya Kiliziya gatolika na Kiliziya yo mu Bwongereza watangiye kugenda gahoro gahoro. Gusenga ku mugaragaro hagati y’Umwami n’Umushumba wa Kiliziya Gatolika ku isi ni ikintu kitigeze kibaho mu myaka irenga 500 ishize .

Umuvugizi w’ubwami bw’u Bwongereza yemeje ko icyo gikorwa ari ikimenyetso cy’ubufatanye, atari impinduka ku myanya cyangwa imiterere y’iyogezabutumwa mu Bwongereza.

Insanganyamatsiko zibanzweho mu isengesho ryahuje Papa Leo XIV n’umwami w’ubwongereza Charles III hagati byagarutse ahanini ku kurengera ibidukikije, ubumwe bw’abakristu ndetse na dipolomasi n’ubufatanye. Isengesho ryibanze cyane ku kurengera ibidukikije ari na byo Umwami Charles III azwiho cyane na Papa Leo XIV akaba yarabishyize imbere mu butumwa bwe.

Ku ngingo irebana n’ubumwe bw’abakristu, isengesho ryahuje Papa Leo XIV n’umwami Charles III rigaragaza intambwe nshya mu rugendo rwo kubaka ubufatanye no kwihanganirana hagati y’amadini akomeye kandi afite inyigisho zitandukanye. Naho ku bijyanye na Dipolomasi n’ubufatanye uru rugendo rwerekana umubano ukomeye hagati y’u Bwongereza na Vatikani mu bihe by’ihindagurika ry’isi, intambara n’imihindagurikire y’ikirere.

Ibinyamakuru bitandukanye byanditse ko benshi mu babibonye babifata nk’igikorwa cy’amahoro n’ubufatanye, ariko kandi hari n’abavugabutumwa bamwe b’Abangilikani bagaragaje impungenge ko gusengera hamwe na Papa bishobora gufatwa nk’ikimenyetso cyo kuvanga imyemerere.

Kiliziya y’u Bwongereza Angilikani yemeje ko nta cyahindutse mu myanya cyangwa mu miterere yayo, kandi ko ari igikorwa cy’ubumwe, atari impinduka y’inyigisho. Banditse ko kuba umwami w’ubwongereza yasengeye hamwe n’umushumba wa Kiliziya gatolika ku isi bidahindura umwanya w’Umwami nk’Umuyobozi Mukuru wa Kiliziya y’u Bwongereza. Ntibivuze kandi ko Kiliziya y’u Bwongereza n’iya Gaturika zihujwe. Ni igikorwa gifatwa nk’ikirango cy’amahoro n’ubufatanye bitari amasezerano y’ubuyobozi. Umwami Charles III n’Umwamikazi Camilla bakoze n’ibindi bikorwa bitandukanye i Vatikani bigamije gushimangira ubufatanye mu bikorwa byo kurengera ibidukikije no gufasha abakene.

Biteganyijwe ko Umwanya wa Royal Confrater (ikicaro cyagenewe umwami) n’intebe izahoraho muri Bazilika ya Mutagatifu Pawulo bikazaba ikimenyetso cy’igihe kirekire cy’ubusabane hagati y’ubwami bw’u Bwongereza n’Ubuyobozi bwa Kiliziya gatolika. Ibi kandi bishobora guteza imbere ibiganiro byisumbuye hagati y’Abangilikani n’Abagatolika, cyane cyane mu bikorwa byo gufasha isi n’abayituye.

Isengesho ry’Umwami Charles III hamwe na Papa Leo XIV ni igikorwa cy’amateka, ni ikimenyetso cy’uko amadini ashobora gufatanya mu gihe isi yugarijwe n’ibibazo bitandukanye.