Cyangugu : Urubyiruko rwiyemeje gufatanya n'abasaseridoti mu myiteguro y'ibirori bya yubile y'ubusaseridoti

Mu butumwa bwa Mgr Ignace KABERA, igisonga cy'umwepiscopi wa diyosezi gatolika ya Cyangugu, yibukije uru rubyiruko ko muri iki gihe Kiliziya gatolika y'u Rwanda iri muri yubile y'impurirane y'imyaka 125 Ivanjiri igeze mu Rwanda n'imyaka 2025, Kristu acunguye isi, ari n'amahirwe ko muri diyosezi Gatolika ya Cyangugu, muri Paruwasi ya Shangi ariho haturiwe misa ya mbere mu Rwanda. Akaba yanasabye uru rubyiruko kwifatanya n'abasaseridoti mu myiteguro y'ibirori bya yubile y'ubusaseridoti izahimbarizwa i Shangi muri Kamena umwaka utaha wa 2025.

Ati" dutangiye umwaka w'ubutumwa w'ikenurabushyo ry'urubyiruko n'abana ariko muri rusange muri diyosezi yacu umwaka w'ubutumwa utangirana n'ukwezi kwa Nzeri, uwa 2024_2025 twawutangiye ku mugaragaro ku itariki 8 Nzeri 2024."

Mgr Kabera yibukije uru rubyiruko ko muri iki gihe Kiliziya gatolika y'u Rwanda iri muri yubile y'impurirane y'imyaka 125 ivanjili igeze mu Rwanda n'imyaka 2025 Kristu acunguye isi, muri diyosezi gatolika ya Cyangugu hateganyijwe ibirori bya Yubile y'ubusaseridoti izahimbarizwa I Shangi kuwa 15 Kamena 2025, ahabitse amateka y'uko ariho hasomewe misa bwa mbere mu Rwanda,

Mgr KABERA kandi yaboneyeho gusaba uru rubyiruko gutangira kwifatanya n'abasaseridoti mu myiteguro y'ibyo birori bya yubile y'ubusaseridoti izahimbarizwa i Shangi muri Kamena umwaka utaha wa 2025.

Ati" Dufite amahirwe rero ko misa ya mbere mu Rwanda, yasomewe muri diyosezi yacu, muri paruwasi ya Shangi, niyo mpamvu rero yubile y'ubusaseridoti izahimbarizwa hano muri diyosezi yacu i Shangi kuwa 15 Kamena umwaka utaha wa 2025. Ikindi rero ni uko tubasaba nk 'urubyiruko kuzifatanya natwe abasaseridoti guhimbaza ya yubile navuze y'ubusaseridoti. Birumvika tuzagenda tubagezaho gahunda zose, muzabe hafi mudufashe, mudushyigikire kubera ko turi abanyu, ni mwebwe tubereyeho."

Padiri UMWANZAVUGAYE Calliope, ushinzwe Komisiyo y'urubyiruko n'abana muri diyoyosezi gatolika ya Cyangugu, nawe yasabye urubyiruko n'abana gutangira gufatanya n'abasaseridoti, kwitegura hakiri kare yubile y'ubusaseridoti izabera i shangi umwaka utaha wa 2025.

Ati" ubutumwa nabagenera ari nabwo Mgr yabageneye, yabashishikarije mbere na mbere gufasha abasaseridoti babo no kubaherekeza muri yubile tuzizihiza kuwa 15 Kamena umwaka utaha wa 2025 i Shangi. Bizadufasha guherekeza abasaseridoti bacu, Mgr yavuze ngo turabanyu ariko nabo ni abacu, tubereyeho bo ariko ntitwabaho batariho. Ni byiza bagomba kuduherekeza muri urwo rugendo rwo kwizihiza yubile y'ubusaseridoti bivuze ngo ubufasha bwa mbere tubasaba ni ukuzaba bahari nyine. Abajene ba diyosezi ya Cyangugu, abana ba diyosezi ya Cyangugu, turabasaba kuzitabira yubile y'ubusaseridoti izabera I shangi kubyitegura mbere birumvikana hari n'indi yubile tuzitegura izaba kuwa 27 Ukuboza 2024 ariko ntibizakuraho ko no mu kwa Gatandatu tuzaherekeza abasaseridoti bacu mu maparuwasi yacu kugira ngo tubafashe kujya kwizihiza ya yubile y'ubusaseridoti izabera i Shangi."

Ku ruhande rw'urubyiruko rwo muri diyosezi Gatolika ya Cyangugu, ruhamya ko ari amahirwe akomeye babonye kuba misa ya mbere mu Rwanda yarasomewe iwabo i Cyangugu muri Paruwasi ya Shangi bityo imigendekere myiza y'ibiroro bya yubile y'ubusaseridoti izahimbarizwa I Shangi muri Kamena umwaka utaha wa 2025, biri mu nshingano zabo nk'uko bisobanurwa na RUGABA Sprien, umuyobozi w'urubyiruko muri diyosezi Gatolika ya Cyangugu

Ati" Abasaseridoti bacu batwizere turahari,amakorali arahari mu myiteguro y'ibirori bya yubile y'ubusaseridoti izahimbarizwa I Shangi, yaba mu bikorwa byose by'amaboko bazakenera turahari, haba mu guhimbaza ibirori nyirizina bya yubile y'ubusaseridoti turahari, tuzajya i Shangi rwose. Buriya ni n'amahirwe kuba muri diyosezi yacu ari ho hambere haturiwe igitambo cy'Ukaristiya bwa mbere muri Kiliziya yo mu Rwanda, urumva rero ko abajene b'i Cyangugu, guhimbaza iyo yubile tubifite mu nshingano."

Uretse kuba umwaka wa 2024- 2025 w'ubutumwa bw' ikenurabushyo ry'abana n'urubyiruko muri diyosezi Gatolika ya Cyangugu, watangijwe ku cyumweru tariki 27 Ukwakira 2024, ubusanzwe umwaka w'ubutumwa muri diyosezi ya Cyangugu utangirana n'ukwezi kwa Nzeri, uyu mwaka w'ubutumwa wa 2024- 2025 muri diyosezi Gatolika ya Cyangugu, ukaba waratangijwe ku mugaragaro kuwa 8 Nzeri 2024, uyu ukaba warahariwe Ubusaseridoti n'Ukaristiya hashingiwe ku kuba kiliziya gatolika mu Rwanda iri muri yubile y'impurirane y'imyaka 125 Ivanjili igeze mu Rwanda n'imyaka 2025 kristu acunguye isi.

Hashingiwe kandi ko mu rwego rwo guhimbaza yubile y'ubusaseridoti mu Rwanda izahimbarizwa muri diyosezi Gatolika ya Cyangugu muri Paruwasi ya Shangi umwaka utaha, kuba kandi i cyangugu aho i Shangi ariho haturiwe misa ya mbere mu Rwanda, hashingiwe kandi ku isano muzi iri hagati y'isakaramentu ry'Ukaristiya n'iry'ubusaseridoti, nyuma yo gushishoza ibi byose, umushumba wa diyosezi gatolika ya Cyangugu Nyiricyubahiro Mgr Edouard Sinayobye, yagennye ko umwaka w'ubutumwa wa 2024-2025 watangiranye n'ukwezi kwa Nzeri 2024, ari umwaka w'Ubusaseridoti na Ukaristiya ufite insanganyamatsiko igira iti" Turangamire Yezu, Umusaseridoti mukuru mu isakaramentu ry'Ukaristiya."