Diyosezi ya Byumba ni yo yakiriye igikorwa cyo kwizihiza icyumweru cy'urubyiruko ku rwego rw'igihugu
Kuri iki cyumweru tariki 29 Mutarama 2023, muri Paruwasi ya Burehe, Diyosezi ya Byumba habereye igikorwa cyo kwizihiza ku nshuro ya 18 umunsi w'urubyiruko Gatolika mu Rwanda. Kikaba cyayobowe na Myr Papias Musengamana, Umwepiskopi wa Byumba ari na we ushinzwe Iyogezabutumwa ry'urubyiruko mu nama y'Abepiskopi.
Uyu munsi witabiriwe n'urubyiruko twari rwaje ku bwinshi guhimbaza umunsi wabo. Uretse abari baturutse muri Paruwasi ya Burehe n'izindi Paruwasi za Byumba, hari n'abayobozi ba Komisiyo y'Abepiskopi ishinzwe Iyogezabutumwa ndetse n'abagize Komite y'urubyiruko n'abandi bashyitsi batandukanye bari baje guhimbaza ibi birori.
Mu butumwa yabagejejeho, Myr Papias, yabasabye guhaguruka bagashakashaka Imana kuko ari yo izabaha umunezero w'ukuri. Ku rugero rwa Bikira Mariya, Myr Papias yasabye urubyiruko guhaguruka bagashyira abandi Yezu.
Ibi ni na byo Padiri Evariste Nshimyumuremyi, umunyamabanga wa Komisiyo y'Abepiskopi ishinzwe Iyogezabutumwa ry'urubyiruko yagarutseho aho yasabye urubyiruko guhaguruka bakirinda kwishora mu ngeso mbi zirimo n'ibiyobyabwenge bikomeje kwibasira urubyiruko.
Padiri Evariste Kandi yibukije urubyiruko gahunda zikomeye ziteganyijwe uyu mwaka zirimo JMJ izabera muri Portugal na Forumu y'igihugu izabera I Kigali abasaba gukomeza kuzirikana izi gahunda no kuzisabira.
Padiri Rwubake Jean Bosco, Omoniye w'urubyiruko ku rwego rwa Diyosezi ya Byumba yashimiye urubyiruko rwa Paruwasi ya Burehe uko rwateguye uyu munsi rukanawitabira anabashimira uruhare bagira mu butumwa n'ibikorwa bya Paruwasi yabo.
Umunsi w'urubyiruko wahimbajwe mu gihugu hose hakaba hanatanzwe n'ubutumwa bugenewe urubyiruko.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
