Diyosezi ya Ruhengeri yiyemeje gukomeza gushyira imbaraga mu itumanaho

Iyi nama yabereye muri Centre pastorale Bon Pasteur yari yitabiriwe n'abagera ku munani barimo abapadiri n'abakristu basanzwe bafite ubutumwa butandukanye muri iyi diyosezi bakaba baranahawe ubutumwa muri komisiyo y'itumanaho. Uretse abagize iyi komisiyo, yanitabiriwe na padiri Fidele Mutabazi, umunyamabanga wa komisiyo y'Abepiskopi ishinzwe itumanaho akaba n'umuyobozi wa Kinyamateka.

Iyi nama yari ibaye iya mbere uyu mwaka yabaye umwanya wo kumenyana ku bahawe ubu butumwa ndetse banarebera hamwe ibikorwa bitandukanye bazitaho mu rwego rwo gufasha itumanaho kuba umuyoboro uhamye w'ubutumwa muri iyi diyosezi.

Mu myanzuro yavuye muri iyi nama, abagize iyi komisiyo biyemeje kongera imbaraga mu guhuza amakuru y'ibikorwa by'iyogezabutumwa muri iyi diyosezi bamenyekanisha ibiteganyijwe buri kwezi hirya no hino mu maparuwasi kandi bakanabikurikirana ngo bitangazwe mu binyamakuru bya diyosezi no ku mbuga nkoranyambaga zayo.

Biyemeje kandi kugira uruhare mu kumvikanisha akamaro k'itumanaho mu iyogezabutumwa no gukomeza kuzuza inzego z'itumanaho guhera ku rwego rwa diyosezi kugera ndetse no ku rwego rw'amaparuwasi.

Mu butumwa yabagejejeho, padiri Fidele Mutabazi, umuyobozi wa Komisiyo y'Abepiskopi ishinzwe itumanaho, yashimiye diyosezi ya Ruhengeri uko igerageza kubahiriza umurongo Kiliziya yatanze mu gukoresha itumanaho rigezweho mu iyogezabutumwa. Gusa yabibukije ko inzira ikiri ndende kugira ngo itumanaho koko ryinjire mu buzima n'ubutumwa bwa Kiliziya nk'umuyoboro w'Ivannjili n'ubumwe bw'abemera.

Agaruka ku bikeneye gukorwa, padiri Fidele yagaragaje ko intambwe ya mbere ikeneye guterwa ari ugufasha abashinzwe inzego zitandukanye z'iyogezabutumwa kumva ko iyogezabutumwa ritagera ku ntego zaryo muri iki gihe, hirengagijwe ikoranabuhanga rigezweho mu itumanaho. Yibukije ko Kiliziya urumuri rw'amahanga ikeneye kumurikira abantu yifashishije ikoranabuhanga rigezweho mu itumanaho.

Padiri Fidele Mutabazi, yaboneyeho kandi gusobanura abagomba kuba bagize komisiyo y'itumanaho asaba ko ku bari baremejwe hakongerwamo uhagarariye abihayimana, uhagarariye ibitangazamakuru bisanzwe bikorera muri diyosezi n'umuhanga muri ICT mu rwego rwo kurushaho guha imbaraga iyi komisiyo. Yasabye kandi abagize komisiyo y'itumanaho gukomeza gukora ubuvugizi kugira ngo komisiyo y'itumanaho ijye ihabwa umwanya mu igenamigambi rya paruwasi na diyosezi mu rwego rwo guhuza imbaraga mu kubona ubushobozi bukenewe mu bikorwa byayo.

Padiri Maniragaba Alexis, umuyobozi wa Komisiyo y'itumanaho muri diyosezi ya Ruhengeri, yashimye abahawe ubutumwa muri komisiyo y'itumanaho abasaba gukomeza guha imbaraga ubutumwa bahawe kugira ngo burusheho kugera ku ntego. Yashimiye kandi padiri Fidele Mutabazi, wifatanyije na bo muri iyi nama amwizeza ko impanuro yabahaye bazakomeza kuzishyira mu bikorwa.

Komisiyo y'itumanaho ni imwe mu makomisiyo y'ubutumwa iteganyijwe muri gahunda z'ubutumwa mu nzego zose za kiliziya. By'umwihariko muri iki gihe cy'iterambere mu ikoranabuhanga n'itumanaho, kiliziya ikaba isaba ko uru rwego rw'ubutumwa rwarushaho guhabwa imbaraga kuko rufite akamaro gakomeye mu gufasha Kiliziya kurangiza umurimo wayo wo kugeza ku bantu inkuru nziza ya Kristu.