Ebola yongeye gutera inkeke mu karere k’ibiyaga bigari

Minisiteri y’ubuzima muri Uganda iherutse gutangaza ko indwara ya Ebola yageze muri iki gihugu, abantu ba mbere yagaraweho bakaba ari abatuye mu gace ka Mubende gaherereye mu rwagati muri Uganda. Iyi minisiteri iherutse kandi gutangaza ko iyi ndwara imaze guhitana abagera kuri 21, ikaba yaramaze no kugera no mu tundi duce twegeranye na Mubende aritwo Kygegwa na Kassanda.

Ku wa gatandatu tariki 24 nzeri 2022 Ruth Aceng, Minisitiri w’ubuzima muri Uganda yakoranyije inama idasanzwe igamije kwiga ku ngamba zo guhashya iki cyorezo cya Ebola kiganje mu karere ka Mubende.Uyu munsi ababyeyi benshi bakaba batangiye kubuza abana babo kujya ku mashuri batinya ko bahandurira icyi cyorezo.

Ni nyuma y’iminsi mike indwara ya Ebola imaze igaragaye na none mu Gihugu cya Repubulika iharanira Demokarasi ya Congo (RDC). Ku wa 15 Kanama 2022 nibwo mu gace ka Beni, gaherereye mu ntara ya Kivu y’Amajyaruguru y’iki gihugu na none hagaragaye umugore w’imyaka 46 yishwe na Ebola, Ishami ry’umuryango w’Abibumbye ryita ku Buzima OMS rikaba ryaratangaje ko ritewe impungenge n’iyi ndwara igenda ikira ikongera ikagaruka muri aka karere;Mu gihe mu kuboza 2021 inzego zishinzwe ubuzima muri iki gihugu zatangaje ko iyi ndwara yamaze gucika burundu.

Nk’uko BBC yabitangaje, OMS ivuga ko ubwoko bwa Ebola buzwi nka Sudan burimo kuboneka muri Uganda butandukanye cyane kandi butica bikabije ugereranyije n’ubwoko bwiswe Ebola Zaire bwabonetse mu myaka ya 2018 na 2020 muri RDC bugahitana abagera ku 2000.

Mu rwego rwo kwirinda ko iki cyorezo cyagera mu Rwanda, Minisiteri y’Ubuzima mu Rwanda iherutse gutanga itangazo riburira abanyarwanda kureka ingendo zitari ngombwa zijya mu gihugu cya Uganda, inasaba abanyarwanda ko mu gihe babonye umuntu ufite ibimenyetso by’iyi ndwara bakwihutira kubimenyesha inzego zibishinzwe.

Minisitiri w’Ubuzima mu Rwanda Dr. Ndamije Daniel yasabye abaturiye uturere duhana imbibe n’igihugu cya Uganda kuba maso, bakareka ingendo zambuka umupaka bajya muri iki gihugu, anasaba abanyarwanda bava muri Uganda kwirinda guca inzira z’ibusamo zibageza mu Rwanda, ko bagomba kunyura ku nzego zibifite mu nshingano kugira ngo bapimwe, harebwe nib anta bwandu bwa Ebola bavanye muri Uganda.

Ebola ni indwara iterwa na vrusi ya “ Ebola”, Ibimenyetso byayo bitangira kugaragara guhera ku minsi 2 kugeza ku byumweru 2. Muri iki gihe nibwo uwayanguye agaragaza ibimenyetso birimo birimo guhinda umuriro, kubabara mu muhogo, kubabara ingingo, kubabara umutwe, isesemi, kuruka, guhitwa bitangira kugaragara ku muntu hagati y’iminsi ibiri n’ibyumweru bibiri nyuma yo kwandura, bigakurikirwa no kudakora kw’umwijima n’impyiko, bihita bitera kuva amaraso menshi ahari umwenge hose ku mubiri.