Hope Walks Rwanda yahuguye Abaganga bazafasha abandi gusobanukirwa n’indwara y’ubumuga bw’ibirenge(Clubfoot) n’uko ivurwa igakira

Nk’uko Munyeshuri Alain umukozi wa Hope Walks Rwanda yabitangarije Kinyamateka, abaganga 10 nibo bahuguwe kuri uyu wa gatatu tariki 7 Nzeri 2022, amahugurwa bahawe n’inzobere mu buvuzi bw’iyi ndwara; amahugurwa yabereye ku kicaro cy’uyu muryango ku Kimironko mu mujyi wa Kigali. Ni amahugurwa yari agamije kungura ubumenyi aba baganga kugira ngo bakomeze kugira uruhare mu gufasha ababagana bafite abana bavukanye ubumuga bw’ibirenge(Clubfoot), aba baganga kandi bakazagira uruhare mu guhugura bagenzi babo n’abajyana bakorana kugira ngo nihagira ubagana afite ubu bumuga, yitabweho uko bikwiye.

Habyarimana Jean Claude, umuyobozi wa Hope Walks ishami ry’u Rwanda avuga ko nyuma y’uko ubushakashatsi bugaragarije ko mubana bavuka buri mwaka mu Rwanda, abagera kuri 500 bavukana ubu bumuga; akavuga ko mu rwego rwo gufasha aba bana ndetse n’ababyeyi babo, uyu muryango wiyemeje kwita ku bana bavukana ubumuga bw’ibirenge (Clubfoot) kuko iyo uwabuvukanye akurikiranywe akiri muto ubu bumuga bukira. Kikaba ari igikorwa Hope Walks Rwanda ikora ku bufatanye na Minisiteri y’ubuzima mu Rwanda.

Magingo aya, Umuryango Hope Walks Rwanda ukorana n’ibitaro 15 biri mu ntara zose n’umujyi wa Kigali, ibyo bitaro ni Ibitaro bya Masaka, Inkuru nziza Gikondo, ibya Muhima mu mujyi wa Kigali; Mu ntara y’uburasirazuba bakorana n’ibitaro bya Nyamata, Rilima, n’ibya Gahini. Mu ntara y’amajyepfo, bakorana n’ibitaro bya Kabgayi, Gatagara, CHUB yo mu mujyi wa Huye. Mu Burengerazuba, bakorana n’ibitaro bya Gihundwe, Kibuye n’ibya Gisenyi. Naho mu ntara y’Amajyaruguru bakorana n’ibitaro bya Ruhengeri.