Gihara: Abana bashimiwe uruhare bagira mu Iyogezabutumwa

Ibi birori byabareye muri Paruwasi St Vincent de Paul Gihara iherereye muri Diyosezi ya Kabgayi, byabanjirijwe n’igitambo cya Misa cyayobowe na Myr Balthazar Ntivuguruzwa, Umwepiskopi wa Diyosezi ya Kabgayi.

Uretse abihayimana batandukanye, ibi birori byitabiriwe n’Umuyobozi w’Akarere ka Kamonyi, Dr Sylvere Nahayo ndetse n’Umunyamabanga Nshingwabikorwa w’Urugaga rw'Amadini n'Amatorero mu kubungabunga Ubuzima (RICH), Jean Marie Vianney Gatete.

Mu butumwa bwe, Myr Ntivuguruzwa wari usangiye Noheli n’abana ba Diyosezi ya Kabgayi ku nshuro ye ya mbere nk’Umwepiskopi wa Diyosezi ya Kabgayi, yavuze ko abana ari amwe mu matafari yubatse Kiliziya.

Ati “Ukuntu mwitangira isengesho n’Igitambo cy’Ukaristiya, kuba mukunda Misa tukababona mu kiliziya ndetse muri abambere, mukurikira Ijambo ry’Imana, mufatanya n’abaje bose gusenga,[…] ndagira ngo mbibashimire. Kubabona imbere ya Alitari biradukomeza, bikomeza Kiliziya.”

"Twe nk’abasaserdoti bituma tubona ko dufite abana bagenda bakura ndetse Imana irabifashisha mu kubaka Kiliziya nshya.”

Myr Ntivuguruzwa yakomeje ashimira aba bana kubw’uruhare bagira mu iyogezabutumwa.

Ati “Mukora ubutumwa bwiza, hari abahereza, abari muri za korali, abari mu miryango ya Agisiyo Gatolika, mu miryangoremezo y’abana n’andi makoraniro y’abana, ndagira ngo mbashimire ubutumwa mukora.”

Myr Ntivuguruzwa ashingiye ku ruhare rw’abana mu iyogezabutumwa, yabasabye gukomeza gukunda yezu bakamwakira, bakamutura ubuzima bwabo kugira ngo akomeze abayobore.

Ati “Iteka Yezu ababere numero ya mbere mu buzima bwanyu aho ari ho hose n’igihe icyo ari cyo cyose.”

"Mukomeze mukunde Yezu, mumuture ubuzima bwanyu, ubw’abarezi banyu, abasaserdoti banyu, bakuru banyu, ababyeyi banyu, igihugu cyacu n’isi yacu, kugira ngo nabo Yezu kristu akomeze ababere numero ya mbere.”

Yongeyeho ko kubera uruhare rwabo, Kiliziya ibakeneye kuko ari indabo nziza zitatse Kiliziya ari nayo mpamvu abasaba kuba abana bashoboye kandi bashobotse.

Jean Marie Vianney Gatete wari waje ahagarariye Urugaga rw'Amadini n'Amatorero mu kubungabunga Ubuzima (RICH) yavuze ko kugira ngo aba bana bakomeze kugira uruhare mu iyogezabutumwa “ni ngomba ko babungabunga ubuzima bwabo kugira ngo bazakure bafite ubuzima buzira ubuze.”

Ati “Kurinda no kubungabunga ubuzima bigomba guhera ku bana kuko abana barumva. Umwana iyo umwigishije kugira isuku, kwikingiza,.. arabyumva ndetse bigatuma akura yumva ko inshingano yo kubungabunga ubuzima atari iy’umubyeyi gusa cg umurezi ahubwo ko nawe ayifitemo uruhare.”

Yakomeje agira ati “Impamvu duhera mu bana rero, n’uko aribo muryango w’ejo, nibo bayobozi b’ejo, nibo bapadiri b’ejo,… ubwo rero tugomba kubatoza ko bakwiriye gukurana ubuzima bwiza ndetse bakanagira uruhare mu kwibutsa ababyeyi babo kwita ku buzima.”

Abana ba Diyosezi ya Kabgayi kandi bashimiwe uruhare bagira mu iterambere ry’Akarere ka Kamonyi.

Ibi byagarutsweho n’Umuyobozi w’akarere ka Kamonyi, Dr Sylvere Nahayo wavuze ko abana biga mu bigo bya Kiliziya ndetse n'ibyo ifatanya na Leta kubw'amasezerano bagize uruhare rukomeye mu bikorwa byatumye Akarere ka Kamonyi gahabwa inka y’Ubumanzi na Ministeri y’Ubumwe bw’Abanyarwanda n’inshingano mboneragihugu.

Bimwe muri ibyo bikorwa harimo kubakira abatishoboye, kubaka ibiro by'imidugudu n’ibindi mu gihe cy’amezi atatu abana basoje icyiciro cya kabiri cy’amashuri yisumbuye bamaze ku Rugerero.

Padiri Leonard Munyangaju, ushinzwe iyogezabutumwa ry’abana ku rwego rwa Diyosezi ya Kabgayi avuga ko iyo Diyosezi yahisemo gushyira imbaraga mu iyogezabutumwa ry’abana ari nayo mpamvu ku rwego rwa Diyosezi hashyizweho umuntu urishinzwe.

Akomeza avuga ko ibi bigamije guhuza abana bakarushaho kumenyana, gusabana na bagenzi babo, kuronka ubumenyi butandukanye, gukora ingendo nyobokamana ndetse bakanafashwa kuba abogezabutumwa bakiri bato.

Padiri Munyangaju akomeza avuga ko ibi yizeye kuzabigeraho abifashijwemo n’Umwepiskopi, ababyeyi ndetse abafatanyabikorwa batandukanye barimo RICH, Unicef, uturere n’abandi.

Mu iyogezabutumwa ry’abana, Padiri Munyangaju yavuze bimwe mu bikorwa bateganya gushyiramo Imbaraga ari uguhugura abafasha b’abana, guhugura abana kugira ngo bagire abana bahugukiwe kandi bajijutse mu iyogezabutumwa ndetse no kugerageza gufasha abana gukuza impano zabo.

Ubusanzwe, umunsi mpuzamahanga wahariwe iyogezabutumwa ry'abana uhimbazwa ku munsi mukuru w'ukwigaragaza kwa Nyagasani ari wo Epifaniya. Uyu munsi washyizweho mu mwaka wa 1950, ushyizweho na Papa Pie XII.