GS Burehe yari ihangayikishijwe n'inyubako zishaje yubakiwe ibyumba bitandatu

GS Burehe ni kimwe mu bigo bitandatu by’amashuri bya Paruwasi Gatolika ya Burehe, muri Diyosezi ya Byumba. Iyi paruwasi yanakiriye ibirori byo gusoza Icyumweru cy'uburezi Gatolika, umwaka ushize wa 2025, yari ihangayikishijwe n'ikibazo cy'ibyumba bishaje by'iri shuri ry'i Nyarurembo, ibintu byari bihangayikishije abarezi, abanyeshuri n'ababyeyi barerera muri iri shuri.

Umuhango wo gutaha ibi byumba witabiriwe n’abanyeshuri, abarezi, ababyeyi, ubuyobozi bw’ishuri, abapadiri bakorera ubutumwa muri Paruwasi ya Burehe, ndetse na delegasiyo y'abaterankunga ba Diyosezi ya Byumba yaturutse mu Budage yari iyobowe na Stefan Leukel, Meya w’Umujyi wa Hachenburg mu Budage, hamwe n’Umuyobozi w’Akarere ka Rulindo, Mukanyirigira Judith.

Nzabarantumye Edouard, wize kuri iri shuri kuva mu 1957 akaba ubu anaryigishamo indimi kuva mu mwaka wa gatatu kugeza mu wa gatandatu w’amashuri yisumbuye, yagarutse ku mateka yaryo n'uko ryaje gusaza bikaba ikibazo gikomeye kubaribagamo.

Ati “Mbere iki kigo cyatangiye ari ishuri rya Kiliziya Gatolika rifite ahantu bigishirizaga hitwaga Katekimena. Nyuma ni bwo baje kubaka amashuri afatika. Aya mashuri twatashye uyu munsi yasimbuye amashuri yariho icyo gihe yari asakaje amategura, nyuma asimbuzwa amabati ariko bigera aho arasaza.”

Yakomeje agira ati “Mu gusaza twaje guhura n’ibiza, umuyaga urayasenya. Noneho biba ngombwa ko padiri ashaka abaterankunga arababona, none amashuri barayubatse mashya ajyanye n’igihe tugezemo.”

Mwarimu Edouard yavuze ko babyishimiye cyane kandi ko ubu noneho abana bagiye kwiga bafite umutekano.

Ati “Twabyishimiye rero n’abana bose barabyishimiye ku buryo ubu abana bagiye kwigamo ntacyo bishisha. Nta kuvuga ngo imvura igiye kugwa bashake aho bajya kugama; ubu baratuje.”

Mu kiganiro Umuyobozi w’Urwunge rw’Amashuri rwa Burehe, Padiri Harerimana Théophile, yagiranye na Kinyamateka, yagarutse ku rugendo rwo gushaka inkunga yo kuvugurura inyubako z’iri shuri.

Padiri Harerimana yakomeje asobanura uko yabagejejeho umushinga wo kuvugurura iri shuri ryari rishaje kuko ryubatswe n'Abamisiyoneri.

Ati“Naberetse umishinga wo kuvugurura ishuri kuko ryari rishaje cyane. Ryari rifite ibyumba bitanu byubatswe n’abamisiyoneri, ariko ntabwo ryari rigezweho. Ryari rishaje, n'ubwo abana baryigiragamo. Nagiraga impungenge zikomeye cyane cyane mu gihe k’imvura.”

Yagize ati “Iri shuri rya GS Burehe, natangiye kuriyobora mu 2024 naje nsangamo ibyumba bishaje. Icyo nahise nkora ni ugushaka inshuti n’abavandimwe n’ubundi bamfashaga aho nakoraga mu burezi. Mu mwaka wa 2024 ni bwo natangiye kwandikira aba bantu bo muri Rhenanie Palatinat, nagiye no kubasura nongera kubabwira ko nimutse na none barongera barambwira bati: ‘Uzandike tuzagufasha nitubona abantu bakeneye gufasha amashuri.”

Padiri Harerimana yagaragaje ko bishimiye kubona amashuri agezweho ati "Twese twishimye nka Diyosezi ya Byumba na Paruwasi ya Burehe, ariko ku buryo bw’umwihariko nkanjye padiri n’abarezi bari muri iri shuri byadushimije. Ni igikorwa tuzabyaza umusaruro.”

GS Burehe ni ishuri rifite abanyeshuri 1.624 biga mu byiciro bitatu: inshuke, abanza n’ayisumbuye mu byiciro byombi. Rifite abarezi 56 bigisha mu byumba 34 by’amashuri. Iri shuri ryashinzwe mu 1932, rikaba ari kimwe mu bigo bikuru bya Paruwasi ya Burehe. Ubuyobozi bwaryo bwatangiye gutekereza ku gutegura yubile y’imyaka 100 izizihizwa mu 2032, mu rwego rwo kuzirikana urugendo rw’imyaka igera ku kinyejana rumaze rutanga umusanzu mu burezi bw’igihugu.