Icyo wamenya ku kwezi kwahariwe urubyiruko na gahunda zizibandwaho

Inama y'Abepisikopi Gatolika mu Rwanda yifuje ko ukwezi kwa mbere kwa buri mwaka kuva ku itariki ya 01 Mutarama kwaharirwa urubyiruko no gushyiraho ibikorwa bigamije gufasha urubyiruko gukura kuri Roho, kugarurira urubyiruko ikizere no kubonera amizero muri Krisitu.

Mu Kiganiro Padiri Alexis Ndagijimana, Umunyamabanga wa Komisiyo y'Abepisikopi Gatolika mu Rwanda ishinzwe Ikenurabushyo ry'urubyiruko yagiranye na Kinyamateka, yasobanuye bimwe mu bikorwa byibandwaho muri uku kwezi kwahariwe urubyiruko bijyanye n'insanganyamatsiko urubyiruko ruri kugenderaho muri iki gihe igira iti "Nimwishimire amizero mufite muri Kiristu".

Yagize ati "Abepisikopi bo mu Rwanda basabye ko ukwezi kwa mbere kwaharirwa urubyiruko no kubasabira by'umwihariko. Tariki ya 19/01/ kugeza kuri 27/01 /2024 hazaba harimo gukorwa Noveni yo gusabira urubyiruko.”

Nk'uko Padiri Ndagijimana akomeza abigarukaho, ibikorwa biteganyijwe muri uku kwezi bikubiye mu ngingo eshanu arizo; Ibikorwa birebana n'ubuzima bwa Roho, ibikorwa byo Kwita ku rubyiruko no kureba aho rugeze mu mishanga yiterambere, ibikorwa birebana no kwigisha no guhugura urubyiruko, ibikorwa bijyanye nimyidagaduro, nibijyanye no gushishikariza urubyiruko kurushaho kwiyumva mu buzima no mu butumwa bwa kiriziya.

Ku bikorwa birebana n'ubuzima bwa Roho Padiri Ndagijimana yavuze ko urubyiruko ruzafashwa gusenga ku buryo bwihariye, ruhabwa Misa, gushengerera, guhabwa penetensiya, kuvuga ishapule no gukora noveni yo gusabira urubyiruko bikozwe n'urubyiruko banasabira urundi rubyiruko rutandukanye mu ngeri zose.

Yakomeje avuga ko ibikorwa byo Kwita ku rubyiruko no kureba aho rugeze mu mishinga y'iterambere ari umwanya umwanya wo kureba aho abajene bageze no gusura imishinga yabo hagamijwe kubahugura no kubafasha muri gahunda z'iterambere.

Mu bikorwa birebana no guhugura no kwigisha urubyiruko, inyigisho zizibanda ku nsanganyamatsiko bafite muri iki gihe 'Nimwishimire amizero mufite muri kristu'. Umwihariko uhari muri uyu mwaka n'uko inyigisho zishingiye kuri Bibiliya, hagamijwe gufasha abajene gusenga bifashishije ijambo ry'Imana.

Muri uku kwezi kandi hazanabaho gushishikariza urubyiruko kurushaho kwiyumva mu buzima no mu butumwa bwa Kiliziya, bikagaragarira cyane ku mwanya wabo muri liturujiya no kwitangira ibikorwa by'urukundo.

Si ibyo gusa kuko hazanakorwa ibikorwa bijyanye n'imyidagaduro.

Mu gice kijyanye n'imyidagaduro harimo cyane amarushanwa anyuranye yateguwe ku rwego rwa paruwase na diyosezi no gukora ibitaramo bigamije gufasha urubyiruko kwidagadura kugira ngo abajene begeranye barushanwe binyuze mu mikino inyuranye.

Ku rwego rwa paruwasi, tariki ya 28/01/2024 hirya no hino muri buri paruwase hazaturwa isengesho ryo gusabira urubyiruko kandi hanatangwe ituro ryo gushyigikira ikenurabushyo ry'urubyiruko.

Uretse ibikorwa bizabera ku rwego rwa paruwasi na diyosezi, hari n'ibikorwa biteganyijwe ku rwego rw'igihugu, harimo nk'urugendo nyobokamana ruzabera mu Ruhango tariki ya 13/03/2024 rugamije gusura ingoro ya Yezu Nyirimpuhwe mu Ruhango no kwitura Impuhwe z'Imana.

Padiri Ndagijimana yakomeje avuga ko ubutumwa butangwa ku rubyiruko ari ubutumwa bw'ihumure ndetse no kwibutsa abajene ko bakwiriye kubyaza umusaruro amahirwe bafite.

Ati "Amwe mu mahirwe urubyiruko rufite rutagomba gupfusha ubusa; icya mbere ni igihe, ku myaka myinshi umujene aba afite imbere ye ntabwo agomba kuyipfusha ubusa cyangwa kuyikoresha nabi. Amahirwe ya kabiri ni inzozi, umujene aba agifite umwanya wo kurota ibyiza, akagira imishinga yifuza kugeraho kandi agaharanira kubigeraho. Ikindi ni imbaraga z'ubwenge, amarangamutima n'umubiri, aba agomba kuzikoresha neza mu gihe cye."

Padiri Ndagijimana yibukije urubyiruko ko rukwiriye kumenya ko rufite amahirwe yo kugira abandi bantu babitaho nk'ababyeyi, abavandimwe n'inshuti, ndetse n'igihugu na Kiliziya.

Agaruka ku mbogamizi urubyiruko rufite muri iki gihe, Padiri Ndagijimana yavuze ko hari byinshi bakwiye gukomeza gusabira urubyiruko kugira ngo Nyagasani abafashe.

Yagize ati "Kwita ku buzima bw'urubyiruko ni inshingano za Kiliziya kandi binayitera ibyishimo. Dufite ikibazo gikomeye mu rubyiruko cy’ubumenyi budahagije mu bijyanye n'iyobokamana nko kudasobanukirwa bihagije bituma bajarajara, ikibazo cy'ubupagani bwinjira mu mayeri, imibanire mibi mu miryango binateza ibikomere mu rubyiruko, ubushomeri n'ubukene bigaragara mu rubyiruko bishobora gutuma barushaho kwiheba, imyemerere ivuguruzanya ishobora gucanga urubyiruko ntirubashe gufata umurongo, kuburira umwanya Imana, ikusanyamakuru n'ikusanyabukungu bituma bamwe mu bajene batakaza indangagaciro z'umuco n'iza gikristu, guta amashuri ku bushake bituma bivutsa amahirwe y'ubuzima , ibiyobyabwenge n'ubusinzi n'izindi ngeso mbi ku buryo buhangayikishije.”

Yongeyeho ati "Ariko hamwe na Yezu twizeye gutsinda.”

Tariki ya 31 Mutarama buri mwaka hahimbazwa umunsi mukuru wa Mutagatifu Yohani Bosiko witangiye urubyiruko cyane, ari nayo mpamvu bafashe ukwezi kwa mbere nk'ukwahariwe urubyiruko aho basoza uku kwezi bahita bahimbaza umutagatifu baragijwe. Ku Rwego rw'igihugu ukwezi k'urubyiruko kuzasorezwa muri Paruwase ya Gisagara muri Diyosezi ya Butare.