Kabgayi: Collège Saint Ignace yahimbaje umunsi mukuru wa Mutagatifu yaragijwe

Ibi birori byabereye ku Kicaro cy'iri shuri ku Mugina, byitabiriwe n'abashyitsi batandukanye bari barangajwe imbere na Myr Balthazar Ntivuguruzwa Umwepiskopi wa Kabgayi. Yari kumwe kandi n'abapadiri biganjemo abakora ubutumwa mu bigo by'amashuri ababaye muri Saint Ignace n'abakoreta ubutumwa mu karere k'ubutumwa ka Kamonyi.

Byitabiriwe kandi n'umuyobozi w'umurenge wa Mugina wari uhagarariye akarere ka Kamonyi, ndetse n'ababyeyi bari baje ari benshi kwifatanya n'iri shuri mu byishimo by'umunsi mukuru ngarukamwaka waryo.

Ibi birori byari bikeye guhera mu ntangiriro byabimburiwe n'Igitambo cya Misa cyayobowe n'umwepiskopi wa Kabgayi. Muri iki gitambo cya Misa Umwepiskopi yahaye amasakaramentu abana barererwa muri Collège Saint Ignace abasaba kwemera kuyoborwa na Yezu:Inzira, ukuri n'ubugingo.

Mu myambaro Yera ku bakobwa, n'Imyambaro yera irimo amabara y'umukara ku bahungu, ubwitonzi n'ubutungane byagaragaraga ku maso, maze bakirana icyubahiro Amasakaramentu ya Batisimu, Ukarisitiya n'Ugukomezwa.

Myr Balthazar imbere y'imbaga y'abari baje muri uyu munsi ntiyahishe akari ku mutima we maze abwira abanyeshuri ba College Saint Ignace ko ari abana beza abasaba kubikomeza.

Hakurikiyeho imikino itandukanye n'ubutumwa aho abarimu ndetse n'abanyeshuri bagaragaje ko Saint Ignace ikataje kurera ku buryo ababyeyi basigaye bayigirira ikizere kugera ubwo bamwe bahisemo ko abana babo bose ari ho baziga amashuri yisumbuye.

Nyuma y'Igitambo cya Misa ibirori byakomeje maze Itorero Indatwa ryakira ku mugaragaro abashyitsi mu mbyino z'umuco nyarwanda.

Muri ibi birori kandi Collège Saint Ignace yashimiye abarezi, ababyeyi n'abanyeshuri bakomeje kuba indashyikirwa ibagenera ikimenyetso cy'ishimwe.