Kibeho yitabiriye imurikabikorwa ry'Ubukerarugendo bushingiye ku Iyobokamana ririmo kubera mu Bufaransa

Bimwe mu byo bagiye kumurika muri iri murikabikorwa harimo kumenyekanisha amateka ya Kibeho, ubutumwa Bikira Mariya yatangiye i Kibeho n'ibindi biranga Kibeho byishimirwa n'abahakorera Ingendo Nyobokamana baturutse Hirya no hino.

Iri murikabikorwa ririmo kubera mu gihugu cy'u Bufaransa mu gace ka Colmar mu mujyi wa Strasbourg. Ryitabiriwe na Padiri Jean Pierre Gatete, umuyobozi wungirije w'Ingoro ya Bikira Mariya i Kibeho, akaba anashinzwe ubuzima bwa roho mu ngoro ya Bikira Mariya.

Kwitabira iri murikabikorwa biri mu rwego rwo kumenyekanisha ibyiza nyaburanga bitatse Nyaruguru harimo n'Ubutaka Butagatifu bwa Kibeho, ahabereye amabonekerwa ya Bikira Mariya mu Rwanda ndetse n'ibindi byiza ndangamuco bihatatse.

Ni ku nshuro ya mbere Kibeho yitabiriye iri murikabikorwa. Padiri Jean Pierre Gatete avuga ko ari umwanya mwiza babonye wo kugaragaza ubukerarugendo bushingiye ku iyobokamana bukorerwa i Kibeho.

Yagize Ati "Ni umwanya mwiza wo kungurana ibitekerezo ku bijyanye n'ubukerarugendo, cyane cyane ubukerarugendo bushingiye ku iyobokamana. Twazanye ibikoresho bitandukanye by'ubuyoboke dusanga i Kibeho, icyayi cy'u Rwanda n'ikawa yu Rwanda. Abasura stand yacu tugenda tubibashishikariza kugira ngo barusheho kumenya u Rwanda, banamenye Kibeho. Abantu benshi baraza bakatubaza amakuru ya Kibeho, tukabibagaragariza kugira ngo barusheho kumenya Kibeho n'u Rwanda."

Ati "Hari ibihugu byinsi byamaze kubaka ubukerarugendo natwe tukaba turi kubigiraho kugira ngo tubashe kumenya uko twafasha abaje batugana cyane ko dufite ibintu byinshi dushobora kubaha no kubereka bijyanye n'ubwiza bwa Kibeho n'ubutumwa umubyeyi Bikira Mariya yatangiye i Kibeho, bukaba ari ubutumwa bureba isi yose.”

Padiri Gatete akomeza avuga ko hari byinshi bungukiye muri iri murikabikorwa harimo nko kumenyana n'ibindi bihugu byateye imbere mu bukerarugendo bushingiye ku iyobokamana.

Iri murikabikorwa ryateguwe n'umuryango "Tourisme sans Frontier". Uyu muryango ukaba usanzwe ukorana n'Akarere ka Nyaruguru na Diyosezi ya Gikongoro binyuze mu mushinga witwa ADENYA (Association de developement de Nyabimata). Intego z'uyu muryango akaba ari ukwita ku bijyanye n'ubukerarugendo.

Iri murikabikorwa ryatangiye tariki ya 9 Ugushyingo 2024 rikaba ribaye ku nshuro ya 39. Ibihugu by'Afurika byitabiriye iri murikabikorwa ni u Rwanda, Côte d'Ivoire, Tchad, Comoros, Madagascal, Burkina Fasso, Benin na Togo.