Myr Edouard Sinayobye Yasezeye ku rubyiruko n"abana 42 ba Diyosezi ya Ruhengeri bari bamaze iminsi 4 mu rugendo shuri i Cyangugu

Mu gusoza uru rugendo, mu gitondo cyo kuri uyu wa mbere tariki ya 4 Werurwe 2024 nyuma y'itambo cya misa yaturiye muri paruwasi Cathedral ya Cyangugu, Nyiricyubahiro Mgr Eduard Sinayobye yabasezeyeho abaha n'umugisha. Mu butumwa yabagejejeho yavuzeko yishimiye umugisha bazanye ndetse n'umutima wo gusangira ubutumwa bukorwa na Komisiyo z"urubyiruko muri diyosezi zombi.

Yagize ati" Nibyo koko twabakiranye urugwiro, mwatumenyesheje ko muzaza kudusura nka Komisiyo y'abana n'urubyiruko twumva turanezererewe, twumva ko mutuzaniye umugisha w'urukundo, bavandimwe bo muri diyosezi ya Ruhengeri kandi mwaje muzanye n'umutima wo gusangira natwe ibyo dufite mu butumwa. Babyita urugendo shuri ariko mu by'ukuri ni urugendo rwo kwigana no kwigiranaho twese.

Nyiricyubahiro Mgr Eduard Sinayobye yakomeje ashimangira ko diyosezi ya Ruhengeri n'iya Cyangugu zifitanye isano ikomeye yo gukunda umubyeyi Bikiramaliya.

Yakomeje agira ati" diyosezi ya Ruhengeri n'iyacu kimwe n'izindi zimwe na zimwe dusangiye gukunda umubyeyi Bikiramaliya kuko mwiyambaza Bikilamaliya w'i Fatima natwe tukiyambaza Umutima utagira inenge wa Bikilamaliya ."

Padiri Umwanzavugaye Calliope ushinzwe Komisiyo y'urubyiruko n'abana muri diyoyosezi gatolika ya Cyangugu na mugenzi we padiri Jean de Dieu Ndayisaba ushinzwe iyi Komisiyo muri diyosezi ya Ruhengeri, mu kiganiro bagiranye na Kinyamateka bose bahuriza kukuba batabyita urugendo shuri gusa kuko ari no gusangira ubutumwa basanzwe bakorana hagati y'izi komisiyo zombi.

Ku ruhande rw'abana cyane abo muri diyosezi ya Ruhengeri bari bahagarariwe na Epiphany Manizabayo peresindante  w'abakangurambaga bita ku bana muri diyosezi ya Ruhengeri, mu kiganiro nawe yagiranye na Kinyamateka yavuze ko uretse ubunararibonye mu ikenurabushyo ry'abana n'urubyiru bungukiye muri uru rugendo, ngo banishimiye ko bahawe  n'umwanya wo gutemberezwa ahantu hatandukanye harimo ku mipaka ya  Rusizi ya mbere n'iya Kabiri ihuza u Rwanda n'umugi wa Bukavu muri RDC, batemberejwe kandi ku Ibanga ry'amahoro ndetse no muri paruwasi ya Nkombo iri mu Kirwa cya Nkombo kiri rwagati mu kiyaga cya Kivu mu murenge wa Nkombo w'akarere ka Rusizi.

Aba bana bo muri diyosezi ya Ruhengeri kandi bavuze ko  ubwo bageraga kuri paruwasi Cathedral ya cyangugu batemberejwe aho   nyakwigendera Nyiricyubahiro Myr Jean Damascen Bimenyimana wabaye  Umwepiscopi wa diyosezi gatolika ya Cyangugu ashyinguye imbere muri kiliziya ya paruwasi Cathedral ya Cyangugu kandi babwiwe amateka ye na ya diyosezi ya Cyangugu muri rusange basobanurirwa n'impamvu umwepiscopi ashyingurwa muri kiliziya, bagashimangira ko ubu ari ubundi bumenyi bungutse bazasangiza bagenzi babo basize mu Ruhengeri.

Abapadiri bashinzwe urubyiruko muri diyosezi ya Cyangugu na Ruhengere bakaba bongeye kubona n'umwanya wo kwibutsa urubyiruko gukomeza neza imyitegiro y'ihuriro rya 21 ry’urubyiruko gatolika mu Rwanda rizabera muri Diyosezi ya Ruhengeri, muri Paruwasi Katedrali ya Ruhengeri, riteganyijwe kuzaba kuva tariki ya 21 kugeza 25 Kanama 2024 rikazaba rifite insanganyamatsiko igira iti “Nimwishimire amizero mufite muri Kristu” (Rom 12,12). Mu gusoza iri huriro kandi mu rwego rw'urubyiruko n'abana hazahimbazwa yubile y'imyaka 2025 Jambo yigize umuntu n'imyaka 125 ivanjiri igeze mu Rwanda. Abana basaga 1000 baturutse mu madiyosezi yose nibo bateganyijwe ko bazitabira ibi birori.