"Nta museminari twifuza ko yirukanwa hutihuti azira amafaranga", Myr Jean Marie Vianney Twagirayezu
Mu birori byo guhimbaza umunsi mukuru wa Seminari Nto ya ZAZA, Myr Jean Marie Vianney Twagirayezu, Umwepiskopi wa Kibungo, Yatangaje ko Diyosezi ya Kibungo irimo gutekereza imishinga itandukanye yo gufasha Seminari mu rwego rwo kwirinda ko hagira umuseminari wirukanwa azira kutabona amafaranga y'ishuri.
Ibi Musenyeri yabitangaje nyuma yo kumenyeshwa n'uhagarariye Ababyeyi ko, umwaka utaha, ababyeyi biyemeje kongera amafaranga y'ishuri mu rwego rwo kugendana n'izamuka ry'ibiciro ndetse no gufasha abaseminari kubaho neza ku ishuri kugira nho banige neza.
Myr Jean Marie Vianney yagarutse ku mishinga itandukanye irimo kubyaza umusarura isambu ya Seminari nto ya Zaza no gushyiraho ikigega cy'Abize muri iyi Seminari mu rwego rwo gufasha Seminari kubona ibikenewe ntawe uhutajwe kubera kubura ubwishyu.
Ati"Ntitwifuza ko hari umwana wirukanwa hutihuti kubera kubura amafaranga y'ishuri."
Yibukije umuhigo w'Abize mu Iseminari ya Zaza wo gushyiraho Ikigega cyo gufasha abaseminari. Yaboneyeho kubasaba kwihutisha uyu mushinga, kugira ngo wunganire Seminari kubona ibyangombwa bikenewe kandi ufashe n'ababyeyi batabasha kubonera ubwishyu igihe n'uko bikwiye.
Musenyeri yashimiye Dr Bikomeye Jean Chrysostome, Umwe mu barerewe muri iyi Seminari, watanze inkunga yo kurihira amafaranga y'ishuri umwana muto wahize abandi, asaba n'abandi kugera ikirenge mu cye bagashyigikira barumuna babo.
Myr JMV kandi yavuze ko Seminari ifite isambu ihagije ku buryo iramutse itunganyijwe neza yafasha abaseminari kubona ibiribwa bihagije. Avuga ko Diyosezi irimo kwiga neza umushinga wo kubyaza umusaruro iyi sambu.
Seminari nto ya Zaza yaragijwe Mutagatifu Kizito. Amateka agaragaza ko yahaye benshi amahirwe yo kwiga mu gihe bari barayabujijwe na Politiki y'Ivangura yahezaga bamwe ku mashuri.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
