Nyundo: Itangwa ry’Ubupadiri muri 2024 ryasorejwe i Murunda

Padiri Joseph Gato yahawe Ubupadiri nyuma y’abandi umunani babuhawe muri Nyakanga n’intangiro za Kanama. Abo ni Padiri Innocent Hakizimana wabuherewe muri Paruwasi Muhato tariki 7 Nyakanga 2024, Padiri Pierre Bizimungu, Padiri Andre Pascal Bana Nganzo, na Padiri Tuyambaze Pacifique babuherewe muri Paruwasi ya Rambo tariki 13 Nyakanga 2024, Padiri Alexandre Bayisenge wabuherewe muri Paruwasi Crete Congo Nil tariki 20 Nyakanga 2024, Padiri Protais Bizimungu, Padiri Daniel Nshimyumikiza na Padiri Pacifique Manirafasha babuherewe muri Paruwasi Mukungu tariki ya 3 Kanama 2024.

Padiri Joseph Gato waherukiye abandi yahisemo intego igira iti “Imana ni Nyir’impuhwe zihebuje. Niduhinduke”

Ijambo rye ryibanze ku gushimira ingeri zinyuranye z’abamufashije mu rugendo rw’ubuzima bwe, haherewe ku babyeyi be kugeza ku Mwepiskopi wamuhaye Isakaramentu ry’Ubusaserodoti.

Uretse ibyo kandi, yanumvikanye yibaza cyane kuri Padiri uwo ari we.

Ati “Padi, Padiri rwose uri iki? Uri inde kandi uturuka he? Ntacyo uri cyo kuko uturuka mu busa. Ntabwo wigenga kuko ubereyeho Imana n’abantu bayo, uri umuhuza w’abantu n’Imana, nturi wowe, uri Kristu, ubwo se uri inde koko? Koko padiri ntiyumvikana, gukomera kwe si ibyo kuri iyi si kuko ibyo byaba ari ugupfobya uwo padiri ari we, Padiri uhuza abantu n’Imana, Padiri Imana yumvira, Padiri nyamara nanone w’umunyantege nkeya?”

Ashingiye kuri ibi bibazo Padiri Joseph Gato yibazaga, Musenyeri Anaclet Mwumvaneza yibukije ko Padiri akwiriye gushakirwa mu nshingano eshatu z’ingenzi aba afite kugira ngo ahuze abantu n’Imana. Izo nshingano ni ukuyobora imbaga y’Imana, kuyigezaho Ijambo ry’Imana no kuyitagatifuza.

Musenyeri Anaclet yanaboneyeho gushimira abapadiri 9 Diyosezi ya Nyundo yibarutse muri uyu mwaka.

By’umwihariko yashimiye Padiri Joseph Gato wahisemo gukirikira Ijwi ry’Imana, akagenda atiganyira cyangwa ngo yigande, akiyemeza kwiga akuze dore ko yari avuye muri Kaminuza y’u Rwanda.

Ati “Batangiye ari 14, gusa aba 9 nibo bakomeje urugendo none bageze ku bupadiri. Ni umugisha kubona abapadiri 9 mu mwaka umwe, ni ibyishimo kandi turabashimira.”

Musenyeri Anaclet yasabye Padiri Gato kuzirikana ko ubu yabaye umubyeyi w’abakuru n’abato.

Ati “Wabaye uwo abakuru n’abato baza kugisha inama kugira ngo ubafashe, ubayobore. Wabaye umubyeyi wa bose, turakwifuriza kuba umubyeyi mwiza ufasha bose. Uzakomeze uvuga uti ndi Uwawe Nyagasani, umpe gukora icyo wantoreye kandi ngikore neza, nkorera abantu n’Imana.”

Padiri Joseph Gato abaye umupadiri wa 21 wibarutswe na Paruwasi Murunda mu myaka 115 imaze ishinzwe.

Murunda ni imwe muri Misiyoni zashinzwe ku ikubitiro kuko yashinzwe ari iya karindwi nyuma ya Save, Zaza, Rwaza, Nyundo, Mibirizi, Kabgayi na Rulindo.

Nk’uko tubikesha inyandiko yakozwe ubwo Murunda yiteguraga Yubile y’Imyaka ijana, Murunda yashinzwe mu muri 1909.

Kugeza ubu, Paruwasi Murunda imaze kwibaruka abapadiri 21 n’abandi bihayimana basaga 20 ndetse hatagize igihinduka umwaka utaha izongera yibaruke undi mupadiri kuko ubu ifite umudiyakoni.

Kugeza ubu kandi, Paruwasi Murunda ifite imiryangoremezo 178 igize inama 36 zigize santarali 7 za Paruwasi Murunda.

Abapadiri ba mbere basesekaye i Murunda tariki ya 16 Gicurasi 1909 ni abapadiri bo mu muryango w’Abihayimana washinzwe na Kardinali Charles Lavigerie: Abo ni Padiri Felix Dufays, Padiri Albert Soubeille na Padiri Henri Ecomard.

Murunda kandi yakozwemo ubutumwa n’abapadiri ba mbere b’abanyarwanda aribo Balthazar Gafuku na Donat Reberaho.