Papa Fransisiko yatumiye abakristu mu isengesho ryo gusabira Sinodi y’Abepiskopi abinyujije kuri Bikira Mariya
Kuri uyu wa Gatatu Tariki 31 Gicurasi 2023, Nyirubutungane Papa Fransisiko, Umushumba wa Kiliziya Gatolika ku isi arifatanya n’ abakristu gatolika mu ngoro za Bikira Mariya hirya no hino ku isi mu isengesho ryo gusabira no gutura Umubyeyi Bikira Mariya Sinodi y’Abepiskopi.
Ku musozo w’Indamutso ya Malayika yo ku cyumweru tariki 28 Gicurasi 2023, Papa Fransisiko yatumiye abakristu bo hirya no hino ku isi kwifatanya na we tariki 31 Gicurasi 2023, umunsi usoza Ukwezi kwa Gicurasi kwahariwe Umubyeyi Bikira Mariya muri Kiliziya; mu isengesho ryo gusabira ibikorwa na gahunda za Sinodi y’Abepiskopi iri kugana ku musozo.
Akimara gutangaza iyi gahunda, ubuyobozi bw’ingoro za Bikira Mariya hirya no hino ku isi bwahise butangaza gahunda y’uwo munsi n’uko iri sengesho rizakorwa. Zimwe muzabashije kugaragaza gahunda ku ikubitiro zirimo Ingoro ya Bikira Mariya y’i Fatima muri Portugal, Ingoro ya Bikira Mariya y’i Czestochowa muri Polonye, Ingoro ya Bikira Mariya yo muri Costa Rica , mu Bufaransa n’izindi mu bihugu bihugu binyuranye byo ku isi.
Aganira na Kinyamateka ku wa 13 Gicurasi, Musenyeri Visenti Harolimana Umwepiskopi wa Ruhengeri yayitangarije ko na Kiliziya Gatolika mu Rwanda izifatanya na Papa Fransisiko muri iri sengesho, rikazabera mu ngoro ya Bikira Mariya y’i Kibeho, ku ngoro ya Bikira Mariya wa Fatima iri kuri Paruwasi Katedrali ya Ruhengeri Ruhengeri n’ahandi abakristu bazamenyeshwa.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
