REB yemeye ko igitabo "Kura ujye Ejuru" cya Padiri Fidele Dushimimana cyakwigishwa mu mashuri y'u Rwanda

Mu ibaruwa yo kuri uyu wa kane tariki 28 Nyakanga 2022, ni bwo ikigo cy'Igihugu gishinzwe uburezi REB, cyatangarije Padiri Fidele Dushimimana, Umuyobozi wungirije wa Kaminuza Gatolika ya Kabgayi (ICK), iki cyemezo, nyuma y'uko yanditse abisaba mu ibaruwa yo kuwa 14 Kamena 2022.

Muri iyi Baruwa Dr MBARUSHIMANA Nelson, umuyobozi mukuru w'Ikigo cy'Igihugu gishinzwe uburezi agira ati "Nkwandikiye ngira ngo nkumenyeshe ko igitabo cyawe "Kura Ujye Ejuru: Uko umwana akura mu gihagararo, mu mitekerereze no mu mibanire ye n'abandi', kemeye gukoreshwa mu mashuri y'u Rwanda.

Igitabo "Kura Ujye Ejuru" cyamuritswe ku mugaragaro tariki 22 Ukwakira 2022, muri Kaminuza Gatolika ya Kabgayi. Nk'uko Padiri Fidele Dushimimana yabitangaje, iki gitabo gikubiyemo ibisubizo bicukumbuye ku bibazo bikomeje kugaragara mu burezi, abantu bakabyibazaho nyamara ntihakorwe ubushakashatsi bwimbitse ngo harebwe ikibitera n'uko byakemuka.

Padiri Fidele DUSHIMIMANA, avuga ko icyamuteye kwandika iki gitabo, ari ukugira ngo atange igisubizo gishingiye ku bushakashatsi bugezweho, ku bibazo yakunze kubazwa n'abarezi n'ababyeyi bagaragaje inyota yo kumenya ibiranga umwana mu bihe bitandukanye by'imikurire ye, n'icyo yakorerwa kugira ngo akure neza ajye Ejuru mu mfuruka zose z'ubuzima bwe.