Ubufatanye mu Burezi hagati ya Kiliziya Gatolika mu Rwanda n'iyo mu Bufaransa bwitezweho byinshi

Izi ntumwa zigizwe na Bwana Philippe, Umunyamabanga mukuru ushinzwe uburezi Gatolika mu Bufaransa, Bwana Louis Marie Piron, Umunyamabanga ushinzwe umubano n'amahanga, Madame Blandine Schmit, Umuyobozi mukuru ushinzwe uburezi gatolika muri Diyosezi ya Creteil na

Padiri Benoit Hagenimana, ukorera ubutumwa muri diyosezi ya Creteil mu Bufaransa.

Uru ruzinduko rwatangiriye muri diyosezi ya Butare aho, baherekejwe na Padiri Dusingizimana Lambert, Umunyamabanga ushinzwe uburezi Gatolika mu nama y'Abepiskopi Gatolika mu Rwanda, bagiranye ibiganiro na Myr Edouard Sinayobye, Umwepiskopi wa diyosezi ya Cyangugu isanzwe ifitanye umubano na Diyosezi ya Creteil ndetse banasura amashuri atandukanye ari muri iyo diyosezi arimo Saint Kizito Save TSS, CJSM Ngoma na Petit Seminaire Virgo Fidelis Karubanda.

Nk'uko bitangazwa na Padiri Lambert Dusingizimana, amasezerano y’ubufatanye mu burezi hagati y’u Rwanda n’u Bufaransa yatangiye mu mwaka wa 2018, agamije kwigiranaho no gufatanya kunoza uburezi Gatolika mu bihugu byombi. Inzego zombi zishinzwe uburezi zikaba zariyemeje kubyutsa ubu bufatanye mu rwego rwo kurushaho guha imbaraga uburezi gatolika mu bihugu byombi.

Myr Edouard Sinayobye umushumba wa Diyosezi ya Cyangugu waje kwakira izi ntumwa yabwiye Kinyamateka ko ubu bufatanye ari amaboko Kiliziya mu Rwanda yungutse mu rwego rwo gukomeza kunoza uburezi nk'umurimo Kiliziya iha umwanya w'ibanze.

Yagize ati”Twakiriye intumwa z’uburezi ziturutse mu Bufaransa muri gahunda yo kunoza no gushyira mu bikorwa kurushaho amasezerano dufitanye. Ni amaboko twungutse kandi twumvikanye ko tuzakomeza gufatanya."

Frere Ntamagiro Jean Bosco umuyobozi wa Saint Kizito Save, kimwe mu bigo byasuwe, yatangarije Kinyamateka ko bishimiye ubu bufatanye kandi ko babutezeho byinshi mu guteza imbere uburezi mu Rwanda.

Yagize ati"Duherutse kuva mu Bufaransa natwe kureba uko uburezi gatolika bwaho buhagaze. Umubano uri kugenda ushinga imizi tunashakisha imbaraga zituma uburezi gatolika bugera ku ntego. Twishimiye ko bahereye mu kigo cyacu cyigisha amasomo y’ubumenyingiro nka bimwe mu byo Leta y’u Rwanda ishyize imbere cyane. Ubufaransa buturusha iterambere ariko natwe twizeye kuzarigeraho kubera ubufatanye. Batwemereye ko abana baho bazajya baza kwimenyereza ibyo biga hano mu Rwanda, kandi n’abacu bakajya mu Bufaransa, twumva ari ikintu kiza kandi cyo kwishimira. “

Uru ruzinduko ruje nyuma y'urwo Padiri Lambert Dusingizimana, Umunyamabanga ushinzwe uburezi mu nama y'Abepiskopi Gatolika mu Rwanda n'itsinda yari ayoboye bagiriye mu Bufaransa. Biteganyijwe ko izi ntumwa zizasura amashuri atandukanye muri Diyosezi ya Butare, Ruhengeri na Arikidiyosezi ya Kigali.