Umwaka wo kwita ku isuku ku mashuri usigiye GS Saint Kizito Gikongoro isura nshya

Mu rwego rwo kureba ibyagezweho muri uyu mwaka wahawe intego yo kwita ku isuku mu mashuri, Kinyamateka yasuye ishuri rya GS Saint Kizito Gikongoro, riherereye muri Paruwasi Katedarali ya Gikongoro, yibonera ibikorwa bitandukanye byagezweho mu kwita ku isuku.

Prosper Uwizeyimana, Umuyobozi wa GS Saint Kizito, avuga ko uyu mwaka hashyizweho gahunda zitandukanye mu rwego rwo guteza imbere isuku mu mashuri bituma irushaho kwitabwaho.

Muri gahunda zihuriweho zatumye isuku iba intero n'inyikirizo muri iri shuri, Prosper, yagarutse kuri Noveni yakozwe ndetse n'ubutumwa bwo kwita ku isuku bwatangwaga kenshi mbere yo gutangira amasomo.

Ku buryo bw'umwihariko, umuyobozi wa GS Saint Kizito Gikongoro yagarutse kuri gahunda y'amarushanwa y'isuku yateguwe ku rwego rwa Diyosezi ya Gikongoro, akavuga ko aya marushanwa yatumye isuku irushaho kwitabwaho ndetse n'amashuri akagira ibyo yihariye yaratira abandi.

Uretse ubu busitani bugaragarira buri wese winjiye muri iri shuri, GS Saint Kizito Gikongoro,ivuga ko uyu mwaka usize ibashije kugura Filtre igezweho mu rwego rwo gufasha abana kunywa amazi afite isuku. Iri shuri kandi ryubatse udutanda tw'amasahani mu rwego rwo gufasha abanyeshuri kubona aho bashyira amasahane igihe bamaze kurya, muri gahunda yo kugaburira abana ku mashuri.

Mu byo GS Saint Kizito Gikongoro yishimira yabashije kugeraho uyu mwaka harimo gutunganya imbuga n'ubusitani bw'ishuri aho ubusitani bwatunganyijwe bugaterwamo ibyatsi byabugenewe, ndetse ahatari ibyatsi hagasaswa amabuye mu rwego rwo kurinda abana ibyondo n'ivumbi igihe bari ku ishuri.

Biteganyijwe ko ibikorwa byo gusoza gahunda z'icyumweru cy'uburezi ku rwego rwa paruwasi ya Gikongoro biteganyijwe kuri uyu wa gatanu tariki 24 Gicurasi 2024. Ni mu gihe ku rwego rwa Diyosezi biteganyijwe tariki 30 Gicurasi 2024, kuri paruwasi ya Mbuga.