Urubyiruko rwitabiriye Forumu ya 19 y'Urubyiruko Gatolika rwihaye intego ruzashyira mu bikorwa rukazanazitoza abandi

Nk'uko umuyobozi wa Komite y'urubyiruko Gatolika ku rwego rw'igihugu yabitangaje mu ijambo rye, intego icyenda ni zo urubyiruko rwitabiriye Forumu ruhagurukanye nk'uko intego ya Forumu yabivugaga rukazajya kuzishyira mu bikorwa aho rutuye. Izo ntego ni izi zikurikira:

1. Twiyemeje kutaba indorerezi mu gihugu cyacu mu mahurirko dushyirirwaho na Kiliziya ndetse no mu materaniro atandukanye,

2. Twiyemeje kwitandukanya n'abaha utubyiniriro ibibi bagamije kubyogeza

3. Twiyemeje ko ibyacu na Yezu bizaba nkunda ndushe

4. Twahisemo gukoresha ubushobozi bwacu mu kubaka igihugu cyacu na Kiliziya aho gutakaza ubushobozi bwau mu bitwangiza,

5. Twiyemeje guhaguruka tukaba abahamya b'ingoma y'ijuru no gutanga icyo byadusaba cyose, waba umwanya amafaranga n'ubundi bushobozi butandukanye,

6. Twiyemeje kudasingiriza Yezu aho twicaye gusa ahubwo ko tugiye guhaguruka tukamushyira abandi.

7. Twiyemeje guhitamo urukundo rwa Yezu,

8. Twiyemeje kwirinda inda zitateganyijwe, kurwanya ibiyobyabwenge no gukumira ibyaha bitaraba,

Yashimiye kandi umuryango w'ababikira b'Ababernardine abamo wemeye kumwakira ukamufasha, ukamukundisha kwiha Imana. Yasoje asaba imbabazi buri muntu wese yaba atarabereye urugero rwiza.

9. Twiyemeje kunga ubumwe n'abandi tugamije guterana inkunga mu kwemera nk'uko Kristu yunze ubumwe na Data na Roho mutagatifu,

Uretse ibyo urubyiruko rwiyemeje Myr Serviliyani Nzakamwita umuyobozi wa Komisiyo y'Abepiskopi ishinzwe iyogezabutumwa ry'urubyiruko yahaye urubyiruko inshingano zo kujyana ibyo rwungukiye muri Forumu rukabigeza ku bandi.

Yabahaye kandi indangagaciro zigomba kubaranga:

1. Kumva no kumvira,

2. kubaha no kwiyubaha,

3. ubusugi n'ubumanzi,

4. Isuku ku mubiri no ku mutima no ku bikoresho mukoresha aho mugenda n'aho mutuye;

5. kuvugisha ukuri no kubaho mu kuri,

6. kubana n'abandi mu butabera no mu mahoro.

7. kwihana, guhanana, kwihanganirana,

8. urukundo rutanga kandi rukitanga,

9. gusaba imbabazi no kuzitanga ndetse no kwiyunga.

Myr Seriviliyani avuga ko izi ndanga gaciro ari zo zizatuma urubyiruko ruvamo abagabo n'abagore beza bafitiwe icyizere n'igihugu na Kiliziya. Muri iyi Forumu kandi urubyiruko rwishimiye kuganirizwa n'abayobozi bakuru b'igihugu n'aba Kiliziya barimo Karidinali Antoni Kambanda, Myr Celestin Hakizimana, Myr Edouard Sinayobye, Myr Smaragde Mbonyintege na Myr Seriviliyanzi Nzakamwita. Baganirijwe kandi na Minisitiri w'urubyiruko n'umuco Mbabazi Rose Mary, Umuvunyi mukuru Nikuze Madeleine na Jenerali james Kabarebe, umujyanama wa Perezida wa Repubulika mu by'umutekano. Ibiganiro bahawe byagarutse ku bushobozi urubyiruko rufite n'urukundo rukunzwe n'igihugu na Kiliziya, rusabwa kubikoresha neza kugira ngo bigire uruhare mu kubaka igihugu na Kiliziya.

Muri iyi Forumu urubyiruko rwasezeye kuri Myr Seriviliyani Nzakamwita wari umaze imyaka 16 ari umuyobozi wa Komisiyo y'abepiskopi ishinzwe iyogezabutumwa ry'urubyiruko. Urubyiruko rukaba rwaramugabiye inka kandi rumwizeza kuzamuhoza ku mutima.

Forumu kandi yaranzwe n'ibikorwa bitandukanye birimo inzira y'umusaraba yazengurutse umugi wa Muhanga ndetse n'umukino w'umupira w'amaguru wahuje abapadiri n'urubyiruko rwitabiriye Forumu, urangira abapadiri batsinze urubyiruko igitego kimwe ku busa.

Forumu y'umwaka utaha wa 2023 izabera muri Arikidiyosezi ya Kigali, ikaba yasabwe kwitegura neza kugira ngo izarusheho kugenda neza nk'uko Kabgayi yabikoze.