College Saint Ignace Mugina ryasabwe guhiga umuhigo wo kuzagaragara mu bahize abandi ku rwego rwIgihugu umwaka utaha

Ibi yabishingiye ku myiyereko y'impano zidasanzwe zagaragajwe n'aba banyeshuri zirimo: kubyina bya Kinyarwanda, kwiyerekana by'umuco nyarwanda, Imivugo, Ikinamico n'ibindi, abiheraho asaba ko no mu masomo bakwiye kuza mu myanya y'imbere ku rwego rw'Igihugu.

Ati"mwagize imikino myiza, mugaragaza ubumenyi mu muco ndetse muri no guharanira kuzazana igikombe ibyo ni byiza. Ariko hari ikindi nifuje, nk'uko bahembye abana babaye indashyikirwa muri iri shuri, ndagira ngo tuhakure umuhigo, umwaka utaha tuzahurire hano duhemba abana babaye 5 ba mbere mu gihugu. Turifuza ko nibura hazagire umwana umwe cyangwa babiri muri iri shuri, tuzabona umwaka utaha basuhuza Minisitiri nawe abaha Mudasobwa. Icyo muzagiharanire, muzazane igikombe cy'umuco ariko muzane n'igikombe cy'ubuhanga n'ubumenyi icyo na cyo muzagiharanire kuko ni cyo kiba cyabahagurukije mu rugo iwanyu."

Padiri Celse Hakuziyaremye yakomeje abwira abanyeshuri ko kugira ngo babigereho basabwa kwiga bashyizeho umwete. Amasomo biga bakayashyiraho umutima, abarimu nabo bagatyaza abanyeshuri kugira ngo ishuri rize ku isonga haba mu muco no mu bwenge."

Umuyobozi w'Akarere ka Kamonyi wungirije ushinzwe imibereho myiza y'abaturage Mme Uwiringira Marie Josée, witabiriye ibi birori, yashimye uruhare rwa Kiliziya Gatolika by'umwihariko Diyosezi ya Kabgayi mu burere n'uburezi butangirwa muri aka Karere.

Bamwe mu banyeshuri baganiriye na Kinyamateka biga muri College Saint Ignace Mugina, batangaje ko ibyo basabwe babyumvise kandi bazabiharanira.

Ntwari Blaise yagize ati "icya mbere ni ugukurikiza amategeko y'abayobozi bacu no kwiga dushyizeho umwete, igihe cyo kwiga tukacyongera niba twigaga nk'amasaha 3 dusubira mu byo twigishijwe tukayongera ndetse tukirinda ibirangaza."

Uwineza Godance nawe yavuze ko bagiye gushyiramo umuhate bakiga ntawubabwirije ahubwo bakumva ko ishema ari iryabo.

Ati "Haba imitsindire no kuzamura umuco n'uburere mboneragihugu mu mashuri, amashuri Gatolika akunda kugaragara mu mashuri ari imbere."

Yatanze uruge rw'ishuri Sainte Bernadethe Kamonyi riherutse kubazanira Igikombe cy'umuco abiheraho asaba n'abo muri Saint Ignace Mugina gukomeza gutera intambwe igana imbere ariko batibagiwe no kwagura Ubumenyi bwo mu ishuri.

Yakomeje asaba abanyeshuri kwiga neza kugira ngo bazabe ingirakamaro ku isoko ry'umurimo. Ati "Banyeshuri mugire intumbero yo kwiga kandi mugere kure mubashe no guhangana ku isoko ryumurimo. Mwige neza kandi muhitemo icyo mushoboye kibabereye bityo bizabafashe mu bijyanye no gukora ndetse n'imibereho, kuko ubutumwa bw'ingenzi mufite aha Ari ukongera ubumenyi mugatsinda."

Ati "Tugiye guguhera ku mpanuro tugezwaho n'ababyeyi bakuru, twirinde kubatetereza, buri wese aharanira gukora neza ibyiza kurushaho, duharanira ikuzo ry'Imana nk'uko Mutagatifu Ignace wa Loyola abitubwiriza."

Umuyobozi w'ishuri rya College Saint Ignace Mugina, Padiri Nsengiyumva Jean Claude, aganira na Kinyamateka yavuze ko nk'uko nta shuri ritifuza kugera ku ntsinzi ari nako na bo iteka bagamije kugeza umwana ku musaruro mwiza bityo bihaye Intego.

Ishuri College Saint Ignace Mugina Ni ishuri rya Kiliziya Gatolika ryigenga ryashinzwe mu 1993 rikaba rimaze imyaka 32 rishinzwe. Ubuyobozi bw'iri shuri butangaza ko kuri ubu rirererwamo abana 830. Ibirori by'umunsi waryo byaranzwe no kugaragaza impano abanyeshuri bifitemo, guhemba indashyikirwa zatsinze neza, guhemba bamwe mu bakozi b'ishuri bafasha abana mu bijyanye n'imibereho myiza n'ibindi.