Icyumweru cy'Ubuskuti cyasorejwe i Byumba

Mu kiganiro Kinyamateka yagiranye na Amede SAHAHA, Komiseri w'Akarere k'Ubusukuti ka Kicukiro akaba na Visi Perezida w'akanama k'igihugu gashinzwe inyigisho n'imfashanyigisho, yagarutse ku bikorwa biranga iki cyumweru.

Yagize ati "Mu cyumweru cy'Ubusukuti dufata umwanya wo kwibuka uwashinze umuryango, tugakoramo ibikorwa bitandukanye kugira ngo twiyibutse, tumenye kandi twibuke ibyo uwadushinze yashakaga aho yifuzaga ko isi tuyigira nziza kurusha uko twayisanze."

Amede Sahaha yakome avuga ko muri iki cyumweru, Abasukuti bo mu Rwanda bakora ibikorwa rusange. Umutwe w'Abasukuti aho uherereye mu Karere, mu Murenge ndetse no mu Kiliziya, ugakora ibyo bikorwa ukurikije ibikenewe mu gace urimo.

Yakomeje agira ati"Isi kuyigira nziza bidusaba kugira icyo dukora. Tubikora buri munsi ariko muri iki gihe cy'Icyumweru tubikora cyane kurushaho kugira ngo bibe nko guhwitura no gukangura uwasinziriye."

Nk'uko akomeza abisobanura, ibikorwa by'uyu mwaka bikaba byaribanze ku kwihangira imirimo no gucunga imari neza, hagendewe ku nsanganyamatsiko igira iti "Musukuti Musukutikazi haranira kongera ubushobozi bugufasha kubaho neza."

Icyumweru cy'Ubusukuti uyu mwaka cyatangiriye mu Karere ka Ngoma gisorezwa mu Karere ka Gicumbi ku wa 22 Gashyantare ari na wo munsi uwashinze umuryango yavukiyeho.

Muri uyu murongo kandi Amede, avuga ko hakozwe ibikorwa byo kubyaza umusaruro ibikorwa by'Ubusukuti biri hirya no hino mu Rwanda hibandwa cyane cyane ku musaruro no kubungabunga ibidukikije.

Umuryango w'Abasukuti (Scouts) ni umwe mu miryango ya Agisiyo Gatolika washinzwe ku wa 01 Kanama 1907, ushinzwe n'umugabo witwa Robert-Baden Powell, awutangiriza mu Bwongereza ari na ho yavukiye.

Baden Yawuhaye ubutumwa bwinshi burimo ubw'urukundo, agamije gukundisha urubyiruko kumenya kwirwanaho, cyane cyane kwita ku nyamaswa n'ibidukikije, no kurutoza gusenga hakurikijwe ukwemera kwabo. Amateka agaragaza ko uyu muryango wageze mu Rwanda mu 1952.