Abanyeshuri bibumbiye muri Club Anti GBV barashima intambwe imaze guterwa mu kurwanya ihohoterwa.

Ibi babitangarije abakozi ba Komisiyo y’Ubutabera n’Amahoro y’Inama y’Abepiskopi Gatolikamu Rwanda mu gikorwa cyo gusura abanyeshuri n’abarimu baba muri aya ma Club mu bigo by’amashuri bya G.S.St Kizito Nduba na G.S.Rutunga ho mu karere ka Gasabo, mu mujyi wa Kigali, ku wa 5 Gicurasi 2023.

Mu mukino nkuru w’abanyeshuri biga muri Club Anti-GBV muri G.S.St Kizito Nduba, bagaragaje amasomo bakuye mu nyigisho bahererwa muri iyi club, bagaragaza uko ihohoterwa rishingiye ku gitsina rikorerwa mu muryango, ku ishuri, hanze muri sosiyete no mu rungano; banagaragaza uko imyumvire yabo yahindutse nyuma yo kujya muri iyi Club.

Madamu Ernestine Musabyimana Umwarimu muri iri shuri, yabwiye Kinyamateka ko bamwe mu banyeshuri bari muri iyi Club batahaga mu miryango irimo amakimbirane n’ihohoterwa bigishije ababyeyi babo ububi bw’ihohoterwa, ababyeyi nabo barasobanukirwa nuko mu ngo zabo haboneka agahenge.

Musabyimana Ernestine yagize ati “ Hano iwacu, hari abana batahaga mu ngo zirimo amakimbirane n’ihohoterwa; amasomo bigira muri iyi Club yabafashije guhinduka no kwigisha ababyeyi babo, nyuma y’iminsi mike tukumva umubyeyi aratubwiye ngo wa mwana yadusobanuriye uko tutagakwiriye guhohoterana, ubu mu rugo tubanye neza nta kibazo.” Ibi ngo byafashije abo banyeshuri kuzamura urwego rw’imitsindire mu ishuri nyuma y’uo nta hohoterwa rikigaragara muri iyo miryango.

Ikirezi Sandrine wiga muri G.S.Rutunga yavuze ko kuba muri Club Anti-GBV byamufashije gusobanukirwa n’uburinganire hagati y’umukobwa n’umuhungu, ko batagomba gusuzugurana, ahubwo bakuzuzanya mu mirimo haba mu rugo no ku ishuri.

Mizero Venuste, Umwarimu muri G.S.Rutunga yabwiye Kinyamateka ko Club Anti- GBV ifasha abanyeshuri b’i Rutunga gukura bazi ihohoterwa icyo ari cyo,n’ uko barirwanya. Asaba abakozi ba Komisiyo y’Ubutabera n’Amahoro kongera umubare w’izi Club, zikanagezwa no ku banyeshuri biga mu mashuri abanza. Ibi abihuriraho na Turahirwa Benoit na we wigisha muri iki kigo, uvuga ko iyo umwana akuze azi ihohoterwa icyo aricyo n’uko ryakwirindwa bimufasha kubana neza na bagenzi be, akazavamo umuntu mwiza kandi w’inyangamugayo.

Soeur Umubyeyi Epiphanie ushinzwe Gahunda yo kurwanya ihohoterwa rishingiye ku gitsina muri Komisiyo y’Ubutabera n’amahoro ya Kiliziya Gatolika mu Rwanda yashimye abarezi bareberera Club Anti-GBV mu bigo by’amashuri umwete n’ubwitange bagira mu kwigisha no guherekeza abanyeshuri muri iyi gahunda, asaba abanyeshuri gukomera mu migenzo myiza bigira muri izi Club, bakaba n’intumwa zigisha bagenzi babo icyo ihohoterwa rishingiye ku gitsina aricyo, n’uko ryakwirindwa haba ku ishuri, mu muryango n’ahandi muri sosiyete.

Soeur Umubyeyi Epiphanie avuga kandi ko abanyeshuri baba muri Club Anti-GBV bagira n’umwanya wo guhabwa inyigisho ku burere mbonezabitsina hifashishijwe imfashanyigisho yateguwe na Komisiyo y’Ubutabera n’Amahoro y’Abepiskopi Gatolika mu Rwanda; izi nyigisho zigafasha uru rubyiruko kumenya by’ukuri ubuzima bw’imyororokere, kugira ngo hirindwe amakuru atariyo urubyiruko rubwirwa n’abashaka kurushora mu ngeso mbi n’andi rwakura ku mbuga nkoranyambaga atari ukuri yatuma rusenya ejo hazaza harwo.

Club Anti-GVB yo muri G.S.Rutunga irimo abanyeshuri 60 n’abarimu 5 bayikurikirana, naho Club Anti-GBV yo muri G.S.St Kizito Nduba ikamo abanyeshuri 65 n’abarimu 5 bayikurikirana.