Abanyeshuri biga muri E.P.St Marc Ruhengeri bishimiye kugera ahandikirwa Hobe na Kinyamateka ibinyamakuru bya Kiliziya Gatolika mu Rwanda

Ni urugendo aba banyeshuri baherekejwe n’ubuyobozi bw’ishuri, abarezi na bamwe mu babyeyi bakoreye bice bitandukanye by’umujyi wa Kigali bikorerwamo ibikorwa by’ingenzi mu gihugu. Iri tsinda ryasuye ahakorera Inteko ishingamategeko y’u Rwanda, inyubako y’imikino n’imyidagaduro ya Kigali Arena ndetse n’Icapiro rya Pallotti Presse Ltd ritunganya inyandiko zirimo ibitabo,ibinyamakuru n’izindi nyandiko zikoreshwa muri serivisi zinyuranye.

Ntwari Ervis wiga mu mwaka wa gatanu na mugenzi we Hirwa Rwego bazuga ko kuva i Musanze bakaza mu mujyi wa Kigali babyishimiye kuko babonye umujyi munini kandi mwiza uruta uwo iwabo i Musanze. Ntwari Ervis yavuze kandi ko yishimiye kugera ahandikirwa Akanyamakuru k’Abana ka Hobe, ngo kuko yari afite amatsiko yo kubona abakandika n’aho kandikirwa.

Kwizera Pauline, umurezi muri iki kigo avuga ko kwigisha abana ibyanditswe mu bitabo gusa bidahagije, bityo nk’abarezi bakaba barasanze ari byiza gukorana urugendo shuri n’abanyeshuri kugira ngo bagere ahakorera inzego zitandukanye zifitiye igihugu akamaro.Bakaba bishimiye kuhagera no kuganira n’abakora muri izi nzego nyuma y’uko babyigisha abana babikuye mu bitabo gusa.

Soeur Uwimana Hilalie, Umuyobozi wa E.P.ST Marc yatangarije Kinyamateka ko urugendo shuri ari kimwe mu bifasha abanyeshuri kwiyungura ubumenyi, rukabamara amatsiko, ndetse rugatuma biga bafite intego yo kuzagera kuri byinshi byiza bitewe n’aho baba barukoreye, ibyo babonye n’ibisobanura bahawe n’abo basanze aho basuye.