Abayobozi b'amashuri gatolika bagaragarijwe umusanzu w'Igihango cy'uburezi(Pacte Educatif Global) mu guteza imbere uru rwego

Myr Filipo Rukamba yavuze ko amasezerano Papa Fransisiko yagiranye n’urwego rw’uburezi ku rwego rw’isi agamije gushyira muntu ku isonga muri gahunda z’uburezi, abarezi n’ababyeyi bakarera umwana bagamije kumutegura ngo azavemo umuntu mwiza, ufite ubumuntu, ubwenge, umutimanama, kandi wubaha abandi n’isi atuye.Bikaba ari igisubizo ku bibazo abantu benshi bamaze igihe bibaza bishingiye ku kuba abantu bagenda bahinduka, isi ikibasirwa n’intambara za hato na hato, ndetse rimwe na rimwe bikagaragara ko abarangije mu mashuri runaka bafite ubumenyi ariko nta mutimanama cyangwa ubumuntu bafite.

Akomoza ku mpinduka aya masezerano azazana mu burezi ababufite mu nshingano nibaramuka bayasize mu bikorwa, Myr Filipo Rukamba yagize ati “ Iki gihango cy’uburezi kizateza imbere urwego rw’uburezi mu byiciro 2, icya mbere ni uguha imbaraga zimwe muri gahunda zari zisanzwe; twavuga nko guteza imbere uburere bw’umwana w’umukobwa, ubufatanye hagati y’abarezi n’ababyeyi ni gahunga zari zisanzwe. Hari ibindi bintu bititabwagaho bigiye gushyirwamo imbaraga, muribyo twavuga: Kureba umuntu muri rusange, umurezi cyangwa umubyeyi ntarebe ubumenyi bw’umunyeshuri gusa, ahubwo akareba n’imyifatire, guto abana hakiri hare kwita ku bidukikije, ibintu byose bijyanye n’ubukungu bikabanza gushyira imbere umuntu.”Akavuga ko bimwe muri ibi byahozeho ariko bisa n’ibitagikorwa bityo iki gihango cy’uburezi kikaba kizafasha mu kongera kubyibutsa no kubitoza abarerwa.

Musenyeri Filipo Rukamba yashimiye abayobozi b’ibigo by’amashuri gatolika umurava n’ubwitange bagaragaza bagamije guteza imbere amashuri bayoboye, ababwirako icyerekana ko umuntu ari umubyeyi ari uko aruhira abo yabyaye; akaba yishimira ko amashuri gatolika akomeje kuba ku isonga mu gutanga uburere bwiza, no mu mitsindire y’ibizamini bya Leta ku rwego rw’igihugu.

Aganira na Kinyamateka, Padiri Bahati Daniel, Uyobora Urwunge rw’Amashuri rwa Kabare, mu karere ka Ngoma, Diyosezi ya Kibungo yayitangarije ko iki gihango kigiye gufasha abarezi n’ababyeyi kongera imbaraga mu gutanga uburezi buhamye kuko muri iki gihe hakomeje kugaragara imyitwarire itari myiza ku bana hirya no hino; iki gihango kikaba kizafasha abarebwa n’uburezi kongera imbaraga mubyo bakora no guaharanira kurera umwana ufite ubumenyi n’ubumuntu ku buryo bwuzuye.

Mutuyimana Colette, Umuyobozi w’ikigo cy’amashuri abanza cya Nyundo giherereye muri Paruwasi ya Ruhango, akarere ka Ruhango, Diyosezi ya Kabgayi yabwiye Kinyamateka ko iki gihango kizavugurura byinshi bitagenda neza mu burezi bwo muri iki gihe kuko ingingo 7 zigikubiyemo zigamije kurera umwana mwiza. Madamu Mutuyimana Colette yagize ati“Ku ruhande rwanjye ndetse na bagenzi banjye twagomeje kuganira, twabonye ko ari ibintu byiza kandi bigiye kugira icyo bivugurura mu burezi. Ingingo twizeho uko ari 7 zose zaganishaga ku kurera umwana mwiza muri iki gihe ariko bifite inkomoko mu muryango, yagera no ku ishuri rikamwereka uburere bwiza n’ubumenyi byombi bikomatanyije kugira ngo azavemo umuntu w’ejo hazaza ufitiye akamaro igihugu, Kiliziya ndetse na we ubwe.”

Tariki 15 Ukwakira 2022 nibwo Nyirubutungane Papa Fransisiko, abinyujije mu butumwa bw’amashusho yatanze ubutumwa buhamagarira abatuye isi bose kwimakaza umuco w’uburezi n’uburere bikomatanyije bihuriweho n’abafata ibyemezo mu rwego rw’uburezi ku isi hose. Muri ubu butumwa, Papa Fransisiko yagaragaje ingingo 7 zigomba kwibandwaho mu rwego rwo kurera neza muntu isi ya none n’iya ejo hazaza bikeneye. Izo ngingo n’izi zikurikira: Guha agaciro ikiremwa muntu no kukigira ipfundo rya byose,Gutega amatwi abakiri bato n’urubyiruko, Guha agaciro abantu b’igitsinagore, Kwibutsa umuryango inshingano zawo, Kwimakaza umuco wo kwakirana bya kivandimwe, Kuvugurura ubukungu na Politiki, Kwimakaza umuco wo kurinda no kubungabunga isi(inzu rusange).